Ana səhifə Toplum |
Abşeronun Saray bələdiyyəsi sədri Vəsilə Əbilhəsənovanın özüylə birlikdə öldürülən həyat yoldaşı Vəfadar Əbilhəsənov "Azərbaycan Polad İstehsalı Kompleksi" QSC-də aparat rəhbəri vəzifəsində çalışıb.
Bu məlumatı Axar.az-a QSC-nin mətbuat xidmətindən təsdiqlədilər. Bildirildi ki, dəhşətli qətlin səbəbi bələdiyyə sədri ilə bağlı olub və hazırda hüquq-mühafizə orqanları təfərrüatı araşdırır.
Hadisə gecə saatlarında ailənin yaşadığı Saray qəsəbəsindəki evində baş verib. Abşeron Rayon Polis İdarəsindən verilən məlumata görə, polis əməkdaşlarının keçirdiyi əməliyyat zamanı hadisəni törədən 1980-cı il təvəllüdlü Hüseynov Fədai Güloğlan oğlu tutulub. O, ifadəsi zamanı cinayəti törətdiyini etiraf edib. Qatil onların evini də yandırıb.
Artıq Fövqəladə Hallar Nazirliyi də baş verən yanğınla bağlı rəsmi məlumat yayıb. Bildirilib ki, Abşeron rayonu, Saray qəsəbəsində vətəndaşa məxsus ümumi sahəsi 350 kv.m olan ikimərtəbəli 8 otaqlı evin birinci mərtəbəsində 1 otaq və əşyaları 20 kv.m sahədə qismən yanıb. Evin qalan hissəsi yanğından mühafizə olunub.
Qeyd edək ki, V.Əbilhəsənova iyunun 8-də doğulub və bu gün 39 yaşını qeyd edəcəkdi.
Tarix
2015.06.08 / 12:20
|
Müəllif
Emin Aslanlı
|