Heydər Əliyev Fondunun prezidenti, birinci xanım, Bakı-2015 birinci Avropa Oyunları Təşkilat Komitəsinin sədri Mehriban xanım Əliyevanin şəxsi dəvəti ilə oyunlarda iştirak etmək üçün Azərbaycanda olan 30 nəfərə yaxın fransalı dövlət xadimi ölkəmizə səfər çərçivəsində Bakı Fransız Liseyi təhsil kompleksini ziyarət edib.

Dövlət Neft Şirkətindən Axar.az-a verilən məlumata görə, qonaqlar arasında Fransa senatının 2 senatoru, Milli Assambleyasının 7 deputatı, 5 şəhər meri və mer müavini olub.

"Azərbaycan-Fransa Dostluq Cəmiyyəti"nin təşəbbüsü ilə Bakıya dəvət olunmuş Fransanın bir qrup yazıçı və naşiri, o cümlədən Miçel Assayas, Burqalat Bertrand, Nataşa Volinski, Mazias Debureauks, Blandin Rinkel, Patrik Amsellem, Armand de Saint Sauveur, həmçinin TOTAL-Azərbaycanın baş menecerinin xanımı Joanna Lemarçalın rəhbərliyi ilə şirkətin bir neçə nümayəndəsi də Bakı Fransız Liseyində olub. Qonaqlar Liseyin infrastrukturu, tədris prosesi və pedaqoji heyəti ilə tanış olub, uşaqlarla söhbətlər aparıblar.

Qonaqları Azərbaycanın Fransadakı Səfirliyinin müşaviri Elmar Məmmədov, "Azərbaycan-Fransa Dostluq Cəmiyyəti"nin prezidenti Elmira Fərəcullayeva və vitse-prezidenti Reyhan Hüseynova müşayiət edib.