Zaqatala rayonunda yeni avtovağzal istifadəyə verilib.

Axar.az-a rayondan verilən məlumata görə, iyunun 15-də yeni avtovağzal binasının açılışı olub. Bu münasibətlə təşkil edilmiş açılış mərasimində Zaqatala rayon İcra Hakimiyyətinin başçısı Mübariz Əhmədzadə, Nəqliyyat Nazirliyinin rəsmisi, müvafiq idarə və təşkilat nümayəndələri və rayon ictimaiyyətinin nümayəndələri iştirak edib.

Tikintisinə 2013-cü ildə başlanılmış yeni avtovağzal Zaqatala şəhərindən 4 km aralıda, Yevlax-Zaqatala-Gürcüstan sərhəd magistral yolunun sol sahilində yerləşir.

Avtovağzalın havalandırma sistemi ilə təchiz olunan gözləmə zalı, bilet satışı kassaları, dispetçer otağı, saxlama kamerası, ana-uşaq otaqları, sürücülərin istirahət otağı, ibadət otağı, kafe, həyətyanı sahədə avtoyuma və texniki müayinə mərkəzi var. Avtovağzal eyni anda 30-a yaxın müxtəlif tutumlu nəqliyyat vasitəsini qarşılamaq və yola salmaq imkanına malikdir.