İkinci Qarabağ savaşı zamanı təmas xəttinə ən yaxın kənd olduğundan Ağdamın Çıraqlı yaşayış məntəqəsindəki evlərə və eləcə də enerji təsərrüfatına ciddi ziyan dəyib.

Axar.az xəbər verir ki, bu barədə Azərişıq ASC-nin açıqlamasında bildirilir.

Məlumatda həmçinin deyilir ki, Vətən Müharibəsi zamanı Ağdam rayonunun Çıraqlı kəndinə çoxlu sayda top və qrad mərmiləri atılıb, fərdi yaşayış evlərinə və elektrik enerjisi təchizatı şəbəkəsinə ciddi ziyan dəyib. Lakin müharibə bitdikdən sonra Prezident İlham Əliyevin müvafiq tapşırıqlarına əsasən kəndlərdə dağılmış evlərə dəymiş zərərlərin aradan qaldırılması ilə bərabər, Çıraqlı kəndində 10/0.4 kvt-luq elektrik şəbəkəsinin yenidən qurmasına başlanılıb və hazırda işlər tamamilə yekunlaşıb.

70 abonentin yaşadığı Çıraqlı kəndində yeni metal dayaqlar basdırılıb, izoliasiyalı naqillər çəkilib, yeni transformator və sayğaclar quraşdırılıb.