Əmək Məcəlləsində nəzərdə tutulub ki, hava temperaturu 41 dərəcəni keçərsə və iş yerində hava temperaturunu süni sürətdə tənzimləmək mümkün deyilsə, iş prosesi dayandırılmalıdır.

Bunu Axar.az-a açıqlamasında hüquq müdafiəçisi Sahib Məmmədov deyib.

Sahib Məmmədov bildirib ki, işin dayandırılması mümkün olmadıqda işəgötürən elə tədbir görməlidir ki, işçilərin sağlığına ziyan dəyməsin:

“Məsələn, iş yerlərinin ətrafında çətirlər quraşdırıla, işçilər həsir baş geyimləri ilə təmin edilə, eyni zamanda, iş prosesinə tez-tez fasilələr verə bilər və s. Əlbəttə ki, hava temperaturu yüksək olduqda iş dayandırılmalıdır. Amma praktikada belədir ki, hava temperaturu 41 dərəcəni aşsa da, iş dayandırılmır. Günvurma hadisələri çoxalır”.

Hüquq müdafiəçisi vurğulayıb ki, işəgötürən işçinin sağlamlığına vurduğu ziyana görə həm hüquqi, həm də maddi məsuliyyət daşıyır.

Qeyd edək ki, Ekologiya və Təbii Sərvətlər Nazirliyi anomal istilərlə bağlı xəbərdarlıq edib.