Bərdə rayon sakini Aynur Xəlilovaya əlillik dərəcəsinin verilməməsi ilə bağlı yayılan sosial media paylaşımları əsasında araşdırma aparılıb.

Bununla bağlı Axar.az-a açıqlama verən Dövlət Tibbi-Sosial Ekspertiza və Reablitasiya Xidmətinin mətbuat katibi Gülnar Əzizova bildirib ki, Aynur Xəlilovanın əlillik dərəcəsinin bərpa edilməsi üçün Agentlik tərəfindən lazımi addımlar atılacaq və tezliklə onun əlillik statusu bərpa ediləcək:

“Aynur Zakir qızı Xəlilovaya məxsus Bərdə Mərkəzi Xəstəxanası tərəfindən e-sistemə daxil edilən göndəriş (forma 88) səthi və natamam tərtib edildiyi üçün səhiyyə müəssisəsinə geri qaytarılıb. Qanunvericiliyə uyğun olaraq, vətəndaşın əlilliyin qiymətləndirilməsi vətəndaş-ekspert ünsiyyəti olmadan səhiyyə müəssisəsi tərəfindən e-sistemə daxil edilən göndərişə əsasən həyata keçirilir. Buna baxmayaraq, Dövlət Tibbi-Sosial Ekspertiza və Reabilitasiya Agentliyinin regional Tibbi-Sosial Ekspert Komissiyasının nümayəndəsi Aynur Xəlilovanın valideyni ilə əlaqə saxlayıb, şəxs əyani müayinəyə dəvət edilib, sənədləri aktlaşdırılıb”.

Qeyd edək ki, Aynur Xəlilova skolioz xəstəliyindən əziyyət çəkir. Aynur Xəlilovaya əlillik dərəcəsinin verilməməsi ilə bağlı yayılan video sosial mediada narazılıq yaradıb.