"ƏMANƏT" - Şəhid və Qazi Övladlarının Fərdi İnkişafına Dəstək Layihəsinin Yay Düşərgəsinin 40-a yaxın şəhid və qazi övladlarından ibarət iştirakçıları İsmayılı yolunda gözlənilməz kobudluqla qarşılaşıblar.

Axar.az xəbər verir ki, bu barədə düşərgənin fəalları sosial şəbəkədə məlumat yayıblar. Onların bildirdiyinə görə, Şamaxıdan Qəbələyə gedərkən uşaqların ayaqyolu ehtiyacını ödəmələri üçün "Şöhlət oğlu" restoranına müraciət etsələr də gözlənilmədən rədd cavabı alıblar.

"Şamaxıdan Qəbələyə gedən zaman İsmayılı yolunda olan uşaqların ayaqyolu ehtiyacını ödəmək üçün "Şöhlət oğlu" restoranına müraciət etdik, onlar icazə vermədiklərini bildirdi, ödəniş etməyi də təklif etdik, qəbul etmədilər. Hətta bildilər ki, uşaqlar şəhid övladlarıdır, yenə də etiraz etdilər... Rəhbərliyə qədər çıxdıq yenə faydası olmadı..."

Bu sitatı düşərgə təşkilatçıları sosial şəbəkələrdə yazıblar. Baş verən hadisə sosial şəbəkələrdə ciddi narazılığa və müzakirələrə səbəb olub.

Layihənin təşkilatçılarından olan Sərxan Bağırlı Musavat.com-a hadisəni təsdiqləyib. Onun sözlərinə görə, daha sonra restorana gedib baş verənlərə etiraz edən insanlar təhqir olunub və qovulub.

Sərxan Bağırlı deyib ki, onlara bu qadağanın səbəbi izah olunmayıb, yalnız deyiblər ki, qadağa rəhbərliyin qərarıdır:

"Bu gün səhər Şamaxıdan Qəbələyə yola düşdük. İsmayıllı rayonu ərazisində uşaqlar tualet ehtiyaclarının olduğunu dedilər. "Şöhlət oğlu" adlı yol kənarı restoranda dayandıq. Ancaq restoranın müdiriyyəti uşaqlara icazə vermədi. Əvvəlcə özüm gedib yaxınlaşdım, uşaqlar üçün icazə istədim. Mənə dedilər ki, müdiriyyət qoymur. Açığı cavabdan şok oldum ki, Azərbaycanda belə adət yoxdur, hər kim olsa belə yolda qalan adama ayaqyolunu bağlamırlar. Uşaqların şəhid və qazi övladları olduğunu dedim, dedim ki, pul da verə bilərik, amma yenə də razı olmadılar. Açığı ilk dəfə belə münasibətlə qarşılaşdığımız üçün şok olduq".