12:34

Azərbaycanın Serbiya, Monteneqro, Bosniya və Herseqovinadakı sabiq fövqəladə və səlahiyyətli səfiri Eldar Həsənovun cinayət işi üzrə məhkəmə prosesi keçirilib.

Axar.az xəbər verir ki, bu gün Bakı Ağır Cinayətlər Məhkəməsində hakim Əfqan Hacıyevin sədrliyi ilə baş tutan prosesdə Eldar Həsənov ifadəsini davam etdirib.

Sabiq səfir səhhətini xatırladaraq, "Möhtərəm hakim, istəyirəm məhkəmə tez başa çatsın, mən də cəzamı alım” deyib.

Hakim isə “hələ sizin cəza alıb-almayacağınızı bilmirik” deyə cavab verib.

Daha sonra prosesdə Buxarestdəki parkın təmir-bərpa işi ilə bağlı ifadə verən Eldar Həsənov deyib ki, həmin parkın təmiri səfirlik tərəfindən həyata keçirilməyib:

“Parkın təmirini aparan şirkəti şəhər meriyası seçib. Təmir-tikintiyə nəzarəti də XİN-in komissiyası aparırdı. Ən əsası odur ki, abadlaşdırma aparan şirkətin təhvil-təslim aktı yox, meriyanın parkı təhvil götürməsi aktı yox, amma müstəntiq burda yeyinti faktı aşkarlayıb. Hansı əsasla?”

Eldar Həsənov bildirib ki səhhəti imkan vermədiyi üçün ikinci epizod üzrə ifadə verən bilmir.

Proses sentyabrın 24-də davam etdiriləcək.