Ana səhifə Toplum |
Yəqin ki, Qida Təhlükəsizliyi Agentliyinin press-relizlərində “damazlıq yumurta” ifadəsinə tez-tez rast gəlirsiniz.
Damazlıq dedikdə – döl verməyə yarayan, döl vermək üçün saxlanılan, döllük, cins nəzərdə tutulur. Bəs bu ifadəni yumurta üçün işlətmək nə dərəcədə doğrudur?
Axar.az olaraq, mövzu ilə bağlı AMEA Nəsimi adına Dilçilik İnstitutuna və bir neçə dilçi alimimizə üz tutduq. Olduqca maraqlı cavablarla qarşılaşdıq. Bəziləri ilk dəfədir “damazlıq yumurta” ifadəsini eşitdiklərini, bəziləri ifadə haqqında məlumatsız olduqlarını və izahlı lüğətə baxmağımızı (yəqin hörmətli dilçimiz lüğət barədə məlumatsızdır, çünki lüğətdə belə bir ifadə yoxdur), bəziləri isə bu sualı ancaq təsərrüfatla məşğul olan şəxslərin cavablandıra biləcəklərini dedi.
Bir sözlə, sualımız cavabsız qaldı. Əgər dilçilərimiz Azərbaycan dilinin düzgün işlədilməsinə dair monitorinq aparmırsa, sözlərimizin bəzilərinin mənası və düzgün ifadəsi barədə xəbərsizdilərsə, o zaman medianın dil normalarını pozmasını hansı əsasla müəyyən edirlər?
İndi isə gələk mövzumuzun əsas məğzinə. “Damazlıq yumurta” nə deməkdir?
Qeyd etdiyimiz kimi, “damazlıq” dedikdə döllük, cins nəzərdə tutulur. Bəs toyuqların kürt düşəndə (bəzən “qırt yatmaq” da deyilir) üzərinə yatdığı və cücənin çıxması üçün yararlı yumurta necə adlanır?
Toyuğun qırt düşəndə üzərinə yatdığı yumurta “mayalı”, yaxud da “toxumlu yumurta” adlanır. Yəni yumurta “damazlıq” olmur, “mayalı” (mayalanmış, “xoruzlu yumurta”) və ya “toxumlu” olur.
Ümid edək ki, Qida Təhlükəsizliyi Agentliyi bundan sonra “damazlıq yumurta” ifadəsindən istifadə etməyəcək.
Tarix
2021.09.28 / 16:10
|
Müəllif
Zeynəb Əkbər
|