Tovuz rayonu 44 günlük Vətən Müharibəsində 70-dən artıq şəhid verib, ancaq onların adlarının əbədiləşdirilməsi məsələsi həllini tapmayıb.

Axar.az xəbər verir ki, bu sözləri millət vəkili, Milli Məclisin Mədəniyyət Komitəsinin sədri Qənirə Paşayeva Milli Məclisin bu gün keçirilən iclasında deyib.

“Tovuz rayonunda çoxsaylı küçələr var ki, onların adı yoxdur. Mövcud qanunvericiliyə yenidən baxıb, şəhidlərimizin adlarının əbədiləşdirilməsi istiqamətində addımlar atmaq olar”, - deyə millət vəkili bildirib.

Deputat əlavə edib ki, şəhid analarının ən çox arzuladığı məsələrdən biri övladlarının adlarının əbədiləşdirilməsidir: “Bunun üçün geniş imkanlar var. Qanuna edilən dəyişiklik bu imkanları daha da genişləndirə bilər”.

Q.Paşayeva Baş nazirə müraciət edərək bildirib ki, Tovuz Rayon İcra Hakimiyyətindən şəhid adlarının əbədiləşdirilməsi məsələsi ilə bağlı Nazirlər Kabinetinə müraciətlər ünvanlanıb:

“Çox xahiş edərdik ki, Zəfər Gününə qədər o müraciətlərə baxılsın”.