Xudafərinlə bağlı döyüş əmri aldıqdan sonra Şükürbəyli, Soltanlı, daha sonra Xudafərin istiqamətində 12 kilometrlik marşla keçərək strateji yüksəkliyə gəldik. Bölmələrimiz əvvəlcə həmin yüksəklikləri ələ keçirdi. Düşmənin həmin ərazidə olan canlı qüvvəsi məhv edildi.

Axar.az xəbər verir ki, bu barədə Xudafərin uğrunda gedən döyüşlərin iştirakçısı, Dövlət Sərhəd Xidmətinin kapitanı Qurban Qurbanov Real TV-yə danışıb.

“Sonra bölmələrimiz Xüdafərin istiqamətində hərəkət edərək Xudafərində bayrağımızı qaldırdılar. Strateji yüksəkliyi ələ keçirdikdən sonra mən və Zəngilan istiqamətində şəhid olan gizir döyüş yoldaşım Məhəmmədəli Ələkbərov komandanlıq tərəfindən verilmiş göstərişə əsasən çevik hərəkət taborunu gətirdik, düşmənin hərəkət etmə ehtimalı olan strateji yüksəkliklərə yerləşdirdik. Nə qədər qürurlu olsaq da, torpaqlarımız düşmən tapdağından azad olsa da, tarixi torpaqlarımızda dövlət bayrağımız qaldırılsa da, müharibədə şəhidlərimiz olurdu. Onlar bizim içimizdən çıxmış, bizimlə birlikdə təlimlərdə iştirak etmiş, müharibəyə qatılıb döyüş əməliyyatlarında iştirak etmiş hərbçilərimiz idilər. Ona görə də qürur və kədər hissi var. Artıq hərbi qulluqçularımız dövlət sərhədi boyu xidmət aparırlar”, - kapitan qeyd edib.

Hərbçimiz bildirib ki, relyefin dağlıq və çətin keçilən ərazi olması şəxsi heyətin susuzlamasına səbəb olurdu:

“Döyüş tapşırığına başlayarkən su və qida ehtiyatı ilə təmin olunurduq. Qidalar vaxtında gətirilib çatdırılırdı. Lakin burada relyefə görə bulaqlar çox deyil. Ona görə Arazın suyundan istifadə edirdik”.