Özbəkistandakı Heydər Əliyev adına Azərbaycan Mədəniyyət Mərkəzi tərəfindən bu ölkədə keçirilən Azərbaycan mədəniyyəti və ədəbiyyatı günləri çərçivəsində Milli Məclisin Mədəniyyət Komitəsinin rəhbəri Qənirə Paşayevaya Turan Akademiyasının tarix elmləri doktoru adı verilib.

Axar.az xəbər verir ki, bu barədə sənədi millət vəkilinə Turan Akademiyasının prezidenti Xaydarbek Bababekov təqdim edib.

Özbəkistanın “Turan” Kitabxana-İnformasiya Mərkəzində keçirilən tədbirdə çıxış edən Xaydarbek Bababekov Qənirə Paşayevanın iki ölkə ilə mədəni, ədəbi əlaqələrini daim diqqətdə saxladığını və bu işə daim töhfələr verdiyini qeyd edib.

Akademik Q.Paşayevanın Özbəkistana dair nəşrlərini, xüsusilə “Addım-addım Özbəkistan” kitabını yüksək qiymətləndirib.

Q.Paşayevanın iştirakı ilə Özbəkistanda keçirilən tədbirlərin, onun özbək dilinə tərcümə olunan kitablarının özbəkistanlı oxucular üçün maraqlı və əhəmiyyətli olduğunu qeyd edən akademik Turan Akademiyasının daim bu cür şəxsiyyətlərin fəaliyyətini təqdir etdiyini və onlarla əməkdaşlığın vacibliyini vurğulayıb.