Ağcəbədi rayonunun Hindarx qəsəbəsində 3 aydır ki, subartezian quyusu sıradan çıxıb. Qəsəbə sakinləri susuz qalıb.

Bu barədə Axar.az-a Hindarx qəsəbə sakinlərinin şikayəti daxil olub.

“Yeraltı suların səviyyəsinin aşağı düşməsi nəticəsində artezianın suyu tamamilə quruyub. Subarteziandan 150 ailə su götürürdü. İndi isə hamı susuz qalıb. Suyu qonşu qəsəbələrdən əllə daşıyırıq”, - sakinlər bildirib.

Məsələ ilə bağlı saytımıza açıqlama verən Azərbaycan Meliorasiya və Su Təsərrüfatı ASC-nin mətbuat katibi Dilqəm Şərifov deyib ki, Hindarx qəsəbəsinin su problemi bu ilin təmir planına salınıb:

“Sözügedən quyunun yanından yenisi qazılacaq. Qəsəbənin su problemi həll olunacaq”.