DAD MMC-nin Quba və Qusar rayonlarından olan sakinləri əmək haqlarını ala bilmədikləri üçün bir araya toplaşıblar.

Axar.az Real TV-yə istinadən xəbər verir ki, Qubanın Dəlləkli kəndində yerləşən və meyvə istehsalı ilə məşğul olan MMC aylardır yüzlərlə vətəndaşın əmək haqqını ödəmir. Bundan narazı olan sakinlər deyir ki, ötən ilin senytabr-noyabr aylarında cəmiyyətdə müxtəlif işlərdə çalışıblar. Onlara söz verilib ki, ən geci il sonuna kimi əmək haqlarını alacaqlar. Lakin sözünün ağası olmayan cəmiyyət rəhbərliyi 1 ildən artıqdır sakinlərə bu gün–sabah deyə-deyə ancaq vəd verməklə məşğuldur. Bu səbəbdən də vətəndaşlar sözün əsl mənasında DAD MMC-nin əlindən dada gəliblər.

Şikayətçi vətəndaşların sözlərinə görə, MMC rəhbərliyi maaşları gecikdirməklə yanaşı, onları əmək müqaviləsi bağlamadan işlədib. Baxmayaraq ki, işə qəbul olunan zaman sakinlərə bununla bağlı söz verilib.

Vətəndaşların şikayəti ilə bağlı DAD MMC-nin də mövqeyini öyrənmək istədik. Lakin MMC rəhbərliyi danışmaq əvəzinə susmağa üstünlük verdi.