12:36

Yeni Saray yaşayış massivi, Ziya Bünyadov küçəsində ümumi istifadədə olan ana yolda qanunsuz tikinti aparılır. Tikili yolun yarısını zəbt edib.

Bu barədə Axar.az-a beynəlxalq hüquq üzrə professor Fərhad Mehdiyev məlumat verib.

O bildirib ki, məsələ ilə bağlı Abşeron Rayon Polis İdarəsinə və Abşeron Rayon İcra Hakimiyyətinə yazılı şikayət verib. Buna baxmayaraq, 22 yanvarda başlayan tikintini bu günə kimi dayandıran yoxdur.

Məsələ ilə bağlı Dövlət Şəhərsalma və Arxitektura Komitəsindən saytımıza verilən açıqlamada qeyd olunub ki, əraziyə icazə sənədini Abşeron Rayon İcra Hakimiyyəti verir:

“Həmçinin yerli səviyyədə şəhərsalma nəzarəti də yerli icra orqanları tərəfindən həyata keçirilir”.

Abşeron rayon yerli icra nümayəndəliyindən və Yeni Saray bələdiyyəsindən isə saytımıza bildirilib ki, sözügedən tikinti ilə bağlı onlara şikayət daxil olmayıb:

“Məsələ araşdırılacaq. Əgər qanunsuz tikili varsa, qarşısının alınması ilə bağlı tədbir görüləcək”.

***

Bələdiyyədən saytımıza bildirilib ki, Yeni Saray yaşayış massivi Ziya Bünyadov küçəsindəki tikilinin sökülməsinə başlanılıb, qanunsuzluq aradan qaldırılır.