Azərbaycan Dövlət Neft Şirkətinin (SOCAR) "Azəriqaz" İstehsalat Birliyinin növbəti "Açıq mikrofon" aksiyası Şamaxı rayonunun çətin relyef şəraitində yerləşən Zarat Xeybəri kəndində baş tutub.

Axar.az-ın “Azəriqaz”a istinadən verdiyi məlumata görə, görüşdə qurumun, habelə Şamaxı Rayon İcra Hakimiyyətinin məsul şəxsləri kənd sakinlərinin problemlərini dinləyiblər.

Aksiya iştirakçılarına indiyə qədər keçirilən "Açıq mikrofon" aksiyaları zamanı ünvanlanan müraciətlərin həlli istiqamətində görülən işlər barədə məlumat verilib. Kənd sakinləri dəniz səviyyəsindən 2 430 metr hündürlükdə, rayon mərkəzindən 45 km kənar ərazidə yerləşən, qış aylarının daha sərt keçdiyi bu kənddə təbii qazın olmaması səbəbindən üzləşdikləri çətinliklərdən söz açıblar.

Çıxış edənlər alternativ yanacaq mənbəyi kimi odunla bağlı da problemlərinin olduğunu, kəndin meşə zolağından kənar ərazidə yerləşdiyini bildirərək “mavi yanacaq”la təmin olunmalarını xahiş ediblər. Aksiya iştirakçılarına ünvanladıqları bütün müraciətlərin Birliyin baş direktoru Ruslan Əliyevə təqdim olunacağını, sözü gedən kəndin qazlaşdırılması ilə bağlı qərarın Birlik rəhbəri tərəfindən veriləcəyi bildirilib.

Şamaxı rayonunun 53 kəndinin, 47-i təbii qazla təmin edilib.