Bakı Teleqüllə Kompleksində yenidənqurma işləri aparılır.

Axar.az xəbər verir ki, təmir işləri Rabitə və Yüksək Texnologiyalar Nazirliyinin "Teleradio" İstehsalat Birliyinin mütəxəssisləri tərəfindən aparılır.

Kompleksin +200 metr səviyyəsindən son nöqtəsi olan +310 metr səviyyəsinədək olan metal hissəsi təmir edilərək, sintetik lüks parlaqlıq boyası ilə rənglənib.

Qeyd edək ki, Teleqüllənin metal hissəsinin +230 m. səviyyəsindən +254 m. səviyyəsinədək olan hissəsində yerləşmiş I və II TV diapazonlu, 75 Om-luq köhnə anten sistemləri çıxarılıb.

Əvəzində, İtaliyanın "Aldena" şirkətinin istehsalı olan, gücü 35 kVt-lıq yeni 8 mərtəbəli FM antena sistemi layihələndirilib və hazırda quraşdırılma işləri davam etdirilir.

Nəticədə, bu ilin sonunadək, 87.50-108.00 MHs tezliyində yayımlanacaq yeni FM radio proqramlarının Bakı şəhəri və Abşeron yarımadasında, həmçinin ondan 100 km radiusda olan ərazidə inamlı qəbulu təmin ediləcək.