Təhsil naziri Mikayıl Cabbarov Azərbaycan Dövlət İqtisad Universitetində qəbul imtahanlarında yüksək nəticə qazanmış tələbələrlə görüşüb.

Nazirlikdən Axar.az-a verilən məlumata görə, görüşdə Bakı ilə yanaşı Gəncə, Abşeron, Bərdə, Qəbələ, Cəbrayıl, Zaqatala, Qubadlı digər rayon və şəhərləri təmsil edən tələbələr iştirak edib.

Görüş iştirakçılarını tələbə adı qazanmaları münasibətilə təbrik edən Mikayıl Cabbarov uğurlarının davamlı olmasını arzulayıb.

Görüş zamanı nazir tələbələrin çoxsaylı suallarını cavablandırıb, orta məktəbi qızıl medalla bitirən tələbələrlə fikirlərini bölüşüb.

Dövlət Proqramı barədə ətraflı məlumat verən Mikayıl Cabbarov ölkəmizdə ali təhsilin inkişaf perspektivləri ilə bağlı danışıb. Nazir tələbələrimizə ölkə daxilində və ya xaricdə oxumağından asılı olmayaraq, Azərbaycanı layiqincə təmsil etməyi, fəal vətəndaşlıq mövqeyi nümayiş etdirməyi tövsiyə edib.

Görüşün sonunda Mikayıl Cabbarov təhsil alanlar üçün geniş imkanlar yaradıldığını qeyd edib və hər bir tələbəni dövlətimizin yaratdığı bu fürsətdən yararlanmağa çağırıb.