Xəbər verdiyimiz kimi, rəqəmsal inkişaf və nəqliyyat nazirinin birinci müavini vəzifəsi ləğv edildi (Əli İzzət oğlu Abdullayev işdən azad olundu), müavinlərin sayı isə 2-dən 5-ə qaldırıldı. Daha öncədən fəaliyyət göstərən iki nazir müavinindən (Rəhman Hümmətov, Rövşən Rüstəmov) əlavə Prezidentin sərəncamı ilə daha 3 müavin təyin edildi: Fərid Əhmədov, Samir Məmmədov və Cavid Qurbanov.

Axar.az xəbər verir ki, yeni nazir müavini F.Əhmədovun innovasiya və təhsil layihələrinə, İnnovasiyalar Agentliyinin, Elektron Təhlükəsizlik Xidmətinin, digər müavin S.Məmmədovun isə nazirliyə məxsus "Aztelekom", "Baktelekom və "AzInTelecom" MMC-lərin fəaliyyətinə nəzarət edəcəyi bildirilir.

Ancaq Azərbaycan Dəmir Yolları QSC-nin rəhbəri vəzifəsindən azad edilərək, rəqəmsal inkişaf və nəqliyyat nazirinə müavin gətirilən Cavid Qurbanovun hansı sahə üzrə fəaliyyət göstərəcəyi hələ də aydın deyil. Bununla bağlı sorğuya da nazirlikdən cavab verilmədi.