ABŞ-ın nüfuzlu “Nyus Blaze” nəşrində Nurit Qrincerin İkinci Qarabağ müharibəsi qaziləri barədə məqaləsi dərc olunub.

Axar.az xəbər verir ki, müəllif İsrail həkimlərinin səyləri nəticəsində azərbaycanlı qazi 24 yaşlı Arif Hacıyevin gözlərinin sağaldığını xatırladıb:

“Yerusəlimdə fəaliyyət göstərən “Misqav Ladax” xəstəxanasında çalışan oftalmoloq Yişay Falik könüllü həkimlər qrupu ilə Akademik Zərifə Əliyeva adına Milli Oftalmologiya Mərkəzində 150 azərbaycanlı qazi üzərində ödənişsiz göz əməliyyatı həyata keçirib”.

Məqalədə bildirilib ki, İkinci Qarabağ müharibəsində yaralanan hərbçilərdən biri də Füzuli rayonunun Yuxarı Əbdürrəhmanlı kəndində yaralanan Arif Hacıyevdir.

24 yaşlı Arif Hacıyev “Nyus Blaze” nəşrinə müsahibəsində Azərbaycan dövlətininin qazilərə qayğısından danışıb. Azərbaycanlı qazi YAŞAT Fondunun onu ev və avtomobillə təmin etdiyini bildirib.

N.Qrincer digər azərbaycanlı qazi Vasif Dilavərzadə barədə də bəhs edib. Müəllif qeyd edir ki, İkinci Qarabağ müharibəsi zamanı yaralanan V.Dilavərzadənin ayağının xilas edilməsi üçün 7 əməliyyat keçirilib.