Barəsində Türkiyədə cinayət işi açılan Alpər Mövlud Ceylan adlı şəxs Mingəçevirdə özəl klinika açır.

Axar.az Azpolitika.info-ya istinadən xəbər verir ki, “Anadolu klinikası” adlandırılan “Qadın və uşaq xəstəlikləri mərkəzi”nin artıq açılışı keçirilsə də, lisenziyası olmadığından fəaliyyət göstərmir.

Açılışa bəzi şou-biznes nümayəndələrini dəvət edən Alpər Mövlud Ceylanın şəxsi klinikasını açmaq üçün vəsaiti Mingəçevir şəhər sakinlərindən topladığı bildirilir. Belə ki, onun bir müddətdir ki, müxtəlif vəzifələr, iş imkanı vəd edərək, klinikanı açmaq üçün xeyli sayda şəhər sakinindən pul aldığı, buna görə səs-küylü bir açılış edərək, “göz boyamağa” çalışdığı iddia olunur.

“Əslində isə icarəyə götürdüyü binada klinika açmaq üçün nə lazımi şərait yaradılıb, nə də zəruri müasir avadanlıqlar alınıb. Bir UZİ və bir neçə başqa aparatla qadın və uşaq xəstəlikləri mərkəzi yaratdığını, klinika açdığını elan etmək insanları aldatmaqdan başqa bir şey deyil”, - deyə məlumatda bildirilir.

Qeyd edilir ki, Alpər Mövlud Ceylan klinika açmaq adı ilə Mingəçevir şəhərinin girişindəki yolun arxa hissəsində yerləşən köhnə Turizm Kollecinin binasını icarəyə götürüb.

Alpər Mövlud Ceylanla bağlı daha ciddi iddia isə onunla bağlı Türkiyədə cinayət işinin açılmasıdır.

Bununla bağlı təqdim edilən sənədlərdən məlum olur ki, onun haqqında cinayət işi Türkiyə Respublikası Kocaeli Şəhər Baş Prokurorluğu tərəfindən 2017-ci ilin oktyabr ayında açılıb.

Alpər Ceylana cinayət işinin açılmasına səbəb isə onun Tvitter hesabından Türkiyə Respublikasının Prezidenti Rəcəb Tayyib Ərdoğana qarşı təhqir xarakterli paylaşım etməsi, ona böhtan atması, şəkilləri üzərində “Fotoşop” proqramı vasitəsi ilə dəyişikliklər edərək, dövlət başçısını aşağılamağa cəhd etməsi olub.

Qeyd edək ki, Alpər Ceylan istintaqa ifadəsində gah belə paylaşım etdiyini xatırlamadığını, gah da əsəbləşərək belə paylaşımlar edə biləcəyini deyib.

Ancaq istintaq, əlbəttə, onun dediklərinə deyil, sübutlara əsaslanıb. Və Ceylanın hərəkətlərində 5237 saylı Türk Cəza Qanununun 125/1-3.a maddəsində qeyd edilən (“Dövlət qulluqçusuna qarşı vəzifəsindən dolayı təhqir”) cinayət tərkibinin olduğu qənaətinə gəlinmiş, sübutların araşdırılaraq qiymət verilməsi üçün iş məhkəməyə göndərilmişdir.

“Şübhəlinin mühakiməsi sizin məhkəməniz tərəfindən aparılacaq və sübutlar uyğun olaraq məhkəmənizin ixtiyarında olacaq. Yuxarıda yazılan müddəalara uyğun olaraq cəzalandırılmasına, qəsdən törətdiyi cinayət səbəbləri ilə bəlli haqlardan məhrum edilməsinə dair qərar verilməsi dövlət adından iddia və tələb edilir” – deyə, Kocaeli Baş Prokuroru Dilek Tosunun imzaladığı istintaq materialında bildirilir.

Ancaq məhkəmə prosesinin keçirilməsi nədənsə uzanıb. Ola bilsin ki, buna səbəb Türkiyədə 2016-cı ildə FETÖ terror şəbəkəsinin törətməyə cəhd etdiyi silahlı dövlət çevrilişi cəhdindən sonra məhkəmələrin həddən artıq yüklənməsi olub.

Yeri gəlmişkən qeyd edək ki, Alpər Ceylanın Türkiyə Prezidentinə qarşı təhqiramiz və böhtan xarakterli paylaşımları Türkiyədə 2014-cü il prezident seçkilərindən əvvələ, FETÖ şəbəkəsinin Ərdoğanı devirmək üçün onun haqqında ağlasığmaz yalanlar yaydığı dövrə təsadüf edir. Bu da onun paylaşımları həmin şəbəkənin təsiri altında edib-etmədiyinin də araşdırılmasını zəruri edir. Onunla bağlı cinayət işinin məhkəmə istintaqının uzanmasının bir səbəbi də bu ola bilər.

Alpər Ceylan da, mümkündür ki, bundan istifadə edərək haqqında veriləcək hökmü gözləmədən Türkiyədən çıxır və 2019-cu ildə Azərbaycana gəlir. Burada klinikaların birində texniki işçi kimi çalışmağa başlayır.

Bu müddətdə Türkiyədə haqqında başlanmış cinayət işinin məhkəmə araşdırması davam etdirilir. Onunla bağlı Türk Cəza Qanununun 125/1-3.a və 53/1 maddələri üzrə ittiham aktı tamamlanır.

Ancaq Alpər Ceylan Azərbaycanda olduğundan onu məhkəməyə cəlb edərək prosesə başlamaq, haqqında hökm vermək mümkün olmur.

Alpər Ceylanın Azərbaycanda olduğu müəyyənləşdirildikdən sonra Kocaeli şəhəri 6-cı Ağır Cinayət Məhkəməsi tərəfindən onunla bağlı ötən ilin dekabr ayında Azərbaycanın ədliyyə orqanlarına vəsatət məktubu göndərilir.

Oxucuları yormamaq üçün qısa şəkildə qeyd edək ki, məktubda Alpər Ceylanın hansı cinayətdə təqsirləndirildiyi və barəsində hansı hüquqi işlərin həyata keçirilməli olduğu vurğulanır. Məhkəmə prosesinin başa çatması üçün, təqsirləndirilən şəxs kimi onun izahatının alınmasına ehtiyac olduğu, lazım gələrsə, məcburi şəkildə səlahiyyətli ədliyyə orqanına gətirilərək dindirilməsi xahiş olunur.

Azərbaycanın ədliyyə orqanlarının bu xahişə nə cavab verdikləri, Alpər Ceylanla bağlı müvafiq hüquqi prosedurların yerinə yetirilib-yetirilmədiyi ilə bağlı hələlik hər hansı bilgimiz yoxdur.

Ancaq Türkiyədə cinayətdə ittiham olunan və həbs ediləcəyi gözlənilən birinin Azərbaycanda klinika açması, əlbəttə, diqqəti cəlb edir. Bunun arxasında hansı qaranlıq məqsədlərin dayandığını söyləmək çətin olsa da, daim Azərbaycanın yanında olan, dövlətimizin güclənməsi, torpaqlarımızın işğaldan azad olunması üçün hər cür dəstəyi verən, Prezident İlham Əliyevin də qeyd etdiyi kimi, ölkəmizdə hamının çox sevdiyi, dövlət başçımızla qardaşlıq münasibəti olan türk dünyasının liderini – Türkiyə Prezidentini qəsdən təhqir edən, onunla bağlı böhtan məlumatlar yayan birinin Mingəçevirdə klinika açması, əlbəttə, xoş qarşılana bilməz. Həm də nəzərə alsaq ki, bu təhqir və böhtanları Alpər Ceylanın sifarişlə həyata keçirdiyi, Türkiyə dövlətinə qarşı olan şəbəkələrin maraqlarına xidmət etməsi ehtimalı da mövcuddur.

“Sual olunur, haqqında cinayət işi və kifayət qədər ciddi şübhələrin olduğu birinə Azərbaycanda iş qurması üçün şərait yaratmaq, vətəndaşlarının sağlamlığını etibar etmək nə qədər doğrudur?” - deyə sayta daxil olan müraciətdə bildirilib.

Müvafiq qurumların bu məsələni diqqətə almasına, Alpər Ceylanla bağlı faktların, eləcə də açılışını planlaşdırdığı klinikanın nəzarətə götürülməsinə ehtiyac olduğu vurgulanır. Sonra gec ola bilər...