Milli Təhlükəsizlik Nazirliyinin keçmiş rəhbəri Eldar Mahmudovun maşın biznesinin rəhbəri Dəmir Abdullayevin MTN-də çalışan oğlu həbs edilib.

Axar.az xəbər verir ki, uzun müddət maşın alveri ilə məşğul olan D.Abdullayev daha sonra Eldar Mahmudova məxsus "Kristal Motors" maşın satışı mərkəzinə rəhbərlik edib. Mərkəz Azərbaycanda ən bahalı maşınlar olan "Yaquar" və "Rənc Rover" avtomobillərinin satışını həyata keçirib. Hazırda həbs olunan Mehman Abdullayev isə Dəmir Abdullayevin oğludur.

Qeyd edək ki, "Virtualaz.org" Baş Prokurorluq tərəfindən MTN-nin daha üç əməkdaşının həbsi barədə xəbər yayıb. Həbs olunanlardan biri də Mehman Abdullayevdir. MTN əməkdaşları barəsində Səbayel Rayon Məhkəməsi tərəfindən 3 aylıq həbs qətimkan tədbiri seçilib.