Ramil Usubovun iştirakı ilə Bakı Şəhər Baş Polis İdarəsində 2013-cü ilin yekunlarına həsr olunmuş geniş əməliyyat müşavirəsi keçirilib.

Bu barədə "Axar.az"a Bakı Şəhər Baş Polis İdarəsindən məlumat veriblər.

Müşavirədə çıxış edən Baş Polis İdarəsinin rəisi, polis general-mayoru Rafiq Abbasov hazırda ölkədə kriminogen durumun nəzarət altında saxlanıldığını bildirib. "Paytaxt polisi qanunla müəyyən edilmiş vəzifələrin, o cümlədən vətəndaşların hüquq və azadlıqlarının təmin edilməsi, cinayət törətmiş şəxslərin məsuliyyətə cəlb olunması istiqamətində məqsədyönlü tədbirləri davam etdirmiş, kriminogen durum nəzarətdə saxlanılmışdır. Hesabat dövründə Bakı şəhərində ümumən 10.524 cinayət hadisəsi qeydə alınmış, onların 82,9%-i (8.714) az ağır və böyük ictimai təhlükə törətməyən, 17,1%-i (1810) isə ağır və xüsusilə ağır növ cinayətlər olmuşdur".

Əməliyyat müşavirəsinin yekununda çıxış edən Daxili İşlər naziri Ramil Üsubov isə polis orqanlarının 2013-cü ildə cinayətkarlıqla apardığı mübarizəsini yüksək qiymətləndirib. O, bu il insan hüquq və azadlıqlarının pozulması hallarının əvvəlki illə müqayisədə xeyli azaldığını vurğulayıb.