Bu gün ADA Universitetində Azərbaycan-Rusiya Universitetlərarası Forumu işə başlayıb.

Təhsil Nazirliyindən Axar.az-a verilən məlumata görə, forumu giriş sözü ilə açan ADA Universitetinin rektoru Hafiz Paşayev Azərbaycanla Rusiya arasında təhsil sahəsində tarixən geniş əlaqələrin olduğunu qeyd edib.

Həmçinin forumda Sumqayıt Dövlət Universitetinin rektoru Elxan Hüseynov, Ufa Dövlət Neft Texniki Universitetinin rektoru Ramil Baxtizin, Azərbaycan Memarlıq və İnşaat Universitetinin rektoru Gülçöhrə Məmmədova, Rusiya Dövlət Humanitar Universitetinin rektor əvəzi Yefim Pivovar, Azərbaycan Dövlət Neft və Sənaye Universitetinin rektoru Mustafa Babanlı, Samara Dövlət Texniki Universitetinin rektoru Dmitri Bıkov və Azərbaycan Texniki Universitetinin rektoru Havar Məmmədov rəhbərlik etdikləri ali təhsil müəssisəsinin fəaliyyəti, qarşılıqlı əməkdaşlığın prioritet istiqamətləri barədə çıxış ediblər. Çıxışlarda forumun təcrübə mübadiləsi baxımından mühüm əhəmiyyəti qeyd olunub, universitetlərarası əməkdaşlığın qurulmasına və elmi əlaqələrin inkişafına töhfə verəcəyi bildirilib.

Qeyd edək ki, forum çərçivəsində Azərbaycan Respublikasının Təhsil naziri Mikayıl Cabbarovun bu mühüm tədbirdə iştirak etmək üçün Bakıya səfər edəcək Rusiya Federasiyasının Təhsil və Elm naziri Dmitri Livanovla görüşü, eləcə də Rusiya-Azərbaycan Ali Məktəblərinin Assosiasiyasının yaradılması barədə memorandumun imzalanması nəzərdə tutulur.