Elektron Ticarət İcması (ETİ) növbəti araşdırmasını reallaşdırıb.

Axar.az xəbər verir ki, ETİ-nin budəfəki araşdırmasının məqsədi 2015-ci ilin sevimli brendlərini müəyyənləşdirmək olub.

İştirakçılar və mütəxəssislər ilin Bankı, GSM operatoru, avtomobil markası, geyim mağazası, supermarketlər şəbəkəsi və digər nominasiyalar üzrə öz seçimlərini ediblər.

ETİ-nin rəhbəri Rəşad Camal açıqlamasında bildirib ki, sorğunun keçirilməsinə səbəb Azərbaycanda bu yöndə informasiya qıtlığının olmasıdır: "Azərbaycanda bu tip araşdırmalar və sorğular az olub. Biz Elektron Ticarət İcması olaraq belə sorğuları bundan sonra daha intensiv keçirməyə çalışacağıq. Gələcəkdə keçirilən sorğuların nəticələri haqqında da detallı məlumatlar hazırlanacaq. Bu araşdırmalar hamı üçün açıq olacaq və nəticələri mediaya təqdim olunacaq. Düşünürük ki, bu tip məlumatlar marketoloqlar, menecerlər və iş adamları üçün data rolunu oynayacaq və onlar bu kimi araşdırmaların nəticələrindən gələcək planlarında istifadə edəcəklər".

Qeyd edək ki, sorğu 25 nominasiya üzrə keçirilib. Sorğuda 150 mütəxəssis də iştirak edib.