Qızımla Elməddin 2013-cü ildə tanış olub.

Axar.az xəbər verir ki, bunu Qubada istirahət mərkəzində sevgilisi Elməddin Əhmədov tərəfindən öldürülən Könül Zalovanın anası deyib. Fəridə Zalova Publika.az-a geniş müsahibəsində bildirib ki, qızı evli olub, bir oğlu var: "Bakı Dövlət Universitetinin Jurnalistika fakültəsini bitirib. Əvvəllər işləyirdi, yaxşı maaş alırdı. Avtomobili də həmin vaxt almışdı.

Maşını almaq üçün atası da kömək etmişdi. Könülün şəxsi mənzili də var, kirayə vermişdi. Elməddinlə də telefon mağazasında tanış olublar. Elməddinin anası əvvəllər müəllimə işləyib, atası isə vəfat edib".

Onun sözlərinə görə, gənclərin tanışlığından az sonra Elməddin küçədə qarşısına çıxıb: "Ədəbsiz şəkildə dedi ki, qızını istəyirəm, evlənəcəyəm, ona yaxşı baxacağam. Sonra həyatından danışdı, dedi, boşanıb. Demə, Elməddin bizə yalan danışırmış, arvadından boşanmayıbmış, iş hələ məhkəmədəymiş. Dedi ki, boşanmasına səbəb arvadının hepatit olmasıdır. Sonra da arvadı haqda nalayiq sözlər danışdı. Sözünü kəsib dedim ki, "Elməddin, arvad xəstə olanda boşayırlar? Bəs azyaşlı uşağına, ona kim baxacaq?" Uşağından da imtina etmişdi. Buna görə xoşum gəlmədi, ailə qurmalarına razı deyildim. Ancaq qızımdan əl çəkmirdi, mobil nömrəsinə, evimizə zəng edirdi".

F.Zalova Elməddinin qızını evdən bayıra çıxmağa qoymadığını və hədələdiyini söyləyib: "Dəfələrlə gecə həyətə gəlib, maşınının nömrəsini açıb götürmüşdü ki, qızım heç yerə gedə bilməsin. Qətldən 2-3 gün əvvəl də Könülü hədələyib. Qızım axşam rəfiqəsigildən gəlirdi. Elməddin zəng edib hədələdi ki, maşının nömrəsini açıb götürəcək.

Qızım gecə tələsik avtomobilini qarajımıza aparmağa çıxdı. Sən demə, oğlan həyətdə onu güdürmüş. Könül zəng edib həyəcanla dedi ki, mama, Elməddin dalımca gəlir. Özünü evə zorla, təngnəfəs çatdırdı. Yaman qorxmuşdu. Elməddin ona çata bilməmişdi..."

F.Zalova qızına bir neçə dəfə təklif edib ki, onu qarabaqara izləyən Elməddindən polisə şikayət etsin: "Amma Könül razı olmurdu. Bir neçə dəfə qızımdan borc pul alıb. Deyirdi ki, ana, əgər Elməddini polisə versək, aldığı pulları qaytarmayacaq. Könülə deyib ki, alverə başlayır, pulları qaytaracaq".

Qadının sözlərinə görə, Könül Elməddinə inanaraq dəfələrlə anasından, atasından və qardaşından borc pul alıb: "Ümumilikdə, 15 min manata qədər borc götürüb. Bu da bir yana, Könülün maşınını satmaq istəyirdi. Qızımın qızıllarının bir hissəsini "Lombard"a qoyaraq pul götürmüşdü. Təxminən 8 min manatdır. Borc kağızları qızımın avtomobilindən tapılıb".

Ana qızı ilə sonuncu dəfə yanvarın 13-də, gecə saat 12-də telefonla danışdığını xatırladıb: "Ad günümü təbrik etdi. Dedi, səhər evdə olacaq, doğum gününü restoranda qeyd edərik. Səsini sonuncu dəfə onda eşitdim. Həmin gecə oğlu Fəridlə də telefonla danışdı. Sonra oğlu ilə mesajlaşıb, sabah saat 5-də evdə olacağını deyib.

Saat 5 oldu, amma Könül gəlib çıxmadı. Gecə saat 11-də narahat oldum. Dedim, yəqin nəsə oldu ki, gəlib çıxmadı. Sən demə, son mesajları yazan Könül yox, Elməddinmiş..."

F.Zalova qeyd edib ki, yanvarın 15-nə keçən gecə polislər qızının meyitinin iki gündür morqda olduğunu bildiriblər: "Elməddin qızımı öldürdükdən sonra açarla avtomobilin qapısını açaraq bəzi sənədləri götürüb. Onların kəbini vardı, kəbin kağızı da yoxa çıxıb.

"Retro" otelinin administratoru ilə söhbət etdik. Bildirdi ki, hadisə yanvarın 13-dən 14-ə keçən gecə baş verib.

Elməddin yanvarın 14-də səhər oteldən çıxıb. Administratora sərhəd buraxılış məntəqəsinə getdiyini deyib. Bildirib ki, onunla gələn qız oteldə qalacaq: "Könül yatıb, yuxudan duranda nə lazım olsa verin, yeməyini gətirin". Qızımı öldürdükdən sonra onun telefonunu götürüb, şəkilləri internetdə yayıb ki, övladımı ləkələsin.

Otelin mühafizəçiləri Könülün uzun müddət oyanmamasından şübhələniblər. Cavab gəlməyəndə ehtiyat açarla qapını açıblar. Bu zaman Könülün öldürüldüyünü görüblər.

Elməddin Könülü dəsmalla boğub. Kondisioneri də söndürərək pəncərələri açıb ki, meyitin iyi ətrafa yayılmasın. Televizorun da səsini qaldırıb ki, guya qız hansısa verilişi izləyir..."

F.Zalova Elməddinin bu qətli tamah məqsədilə törətdiyini deyib: "O, Könülü qətlə yetirib ki, pulları qaytarmasın. Saxlanılan zaman üstündən 5 şəxsiyyət vəsiqəsi çıxıb. Bir şəxsiyyət vəsiqəsini isə oteldən tapıblar. Bununla yanaşı, Elməddin aliment ödəmədiyinə görə son günlər axtarışa verilibmiş".

Qeyd edək ki, K.Zalova yanvarın 15-də öldürülüb və qatili E.Əhmədov həbs olunub. Hadisə Qəçrəşdəki "Retro" istirahət mərkəzində baş verib.

Könülün atası Zülfi Zalovun Sumqayıt Dövlət Universitetində müəllim işlədiyi deyilir.