"Oğuz" Müstəqil Araşdırmaçılar Qrupunun təşkilatçılığı ilə "Dini-səmavi mətnlərdə Azərbaycan" mövzusunda MQF Bakı QHT Resurs və Təlim Mərkəzində dəyirmi masa keçirilib.

Axar.az xəbər verir ki, tədbiri "Oğuz" MAQ rəhbəri Vüqar Zifəroğlu açıb.

Azərbaycanın zəngin mənəvi dəyərlər sisteminə malik olduğunu bildirən Zifəroğlu bununla əlaqədar dini mətnlərdə istinadlar tapmağın mümkünlüyünü bildirib:

"İstər Tövrat, istər Zəbur, istərsə də İncildə tarixi keçmişimizlə bağlı bu cür qeydlər kifayət qədərdir. İslam dininin müqəddəs kitabı olan Quranda isə Azərbaycanla bağlı olan bir çox maraqlı məqamlar tapmaq mümkündür və tədbirin keçirilməsində də əsas məqsəd məhz bu məqamlara diqqət çəkməkdir".

Tədqiqatçı Ceyhun Bayramlı "Quran ayələrində Azərbaycan və türklük" mövzusunda birliyin hazırladığı slaydın əsasında geniş şəkildə çıxış edib:

"Quran tarixşünaslığına yeni baxış sərgilənməlidir. Qurani-Kərimdə qeyd olunmuş tarixi hadisələrlə bağlı məlumatlar da, bəzi din xadimlərinin fikirlərinin əksinə olaraq, təkcə ərəblərin keçmişini və Ərəbistan yarımadasını deyil, Yer kürəsinin qədim dövr insanları yaşamış bir çox məkanlarını əhatə etməkdədir. Dinimizin müqəddəs kitabında Azərbaycanla bağlı bir sıra qeydlər var".

Tədqiqatçı daha sonra Musa ilə Xızırın görüşdükləri məkan, Quranda adı keçən Ərrəs əhli, Səba eli və Bilqeys qissəsi, Quranda və eləcə də digər səmavi kitablarda adı çəkilən Mədyən eli, Zülqərneyn səddi, Ad qövmü barədə geniş məlumat verərək onların Azərbaycanla bağlılığına diqqət çəkib.