Mətbuatda yayılan xəbərlərdən sonra AZAL araşdırmalara başlayıb.

Bu sözləri Axar.az-a Azərbaycan Hava Yolları QSC-nin (AZAL) prezidentinin ictimaiyyətlə əlaqələr üzrə köməkçisi Paşa Kəsəmənski deyib.

Onun sözlərinə görə, Naxçıvan üzrə uçuşlarda bilet qıtlığı yoxdur:

"Naxçıvana uçan təyyarələrdə heç bir problem yoxdur. Hətta hər təyyarədə boş yerlər olur. Biletin qiyməti 50 manatdır və bilet çatışmazlığından söhbət belə gedə bilməz. Bilirsiniz ki, Naxçıvan üzrə biletlər təkcə şəxsiyyət vəsiqəsi ilə satılır. Buna görə də ola bilsin ki, kimsə bileti alıb baha qiymətə satsın. Mətbuatda yayılan xəbərlərdən sonra AZAL araşdırmalara başlayıb".

Xatırladaq ki, mətbuatda son günlər Naxçıvana gedən sərnişinlərin süni qiymət artımı ilə üzləşməsi haqda məlumatlar yayılıb.

Sərnişinlərin verdiyi məlumata görə, 50 manatlıq bilet tapmaq indi çox çətindir. Bəzi işbazlar isə həmin biletləri hava limanındakı sərnişinlərə 100 manata təklif edir. Onlar Naxçıvana bilet tapmayanların şəxsiyyət vəsiqəsinin fotoşəklini telefonla çəkir və 15 dəqiqədən sonra bilet gətirib verirlər.