Bizim nəqliyyat vasitələrimiz var, vaxtilə alınıb və onların istifadə müddəti başa çatmayıb. Bu müddət başa çatdıqdan sonra o barədə qərar qəbul edəcəyik.

YAP-ın icra katibinin müavini, deputat Siyavuş Novruzov bunu ölkə prezidentinin tövsiyəsindən sonra hakim partiyanın Naxçıvan istehsalı olan "NAZ-Lifan" markalı avtomobillər sifariş edib-etmədiyi barədə Musavat.com-un sualını cavablandırarkən söyləyib.

Bununla belə, S.Novruzov qeyd edib ki, partiyanın rayon, şəhər təşkilatlarına göstərişlər verilib: "Bizim partiyanın 84 rayon və şəhər təşkilatı var. Təşkilatların təqribən 60-ı üzvlük haqları hesabına müxtəlif markalı maşınlar alıblar və nəqliyyat vasitəsi ilə təmin olunublar. Qalan təşkilatlarımız isə bundan sonra avtomobillər almaq təşəbbüsündə bulunduqda, məhz adıçəkilən avtomobildən istifadə edəcəklər. Bizim Naxçıvandakı şəhər və rayon təşkilatlarının hamısında "Naz-Lifan" var. Digərlərinə də demişik ki, bundan sonra alınan maşınlar ancaq "Naz-Lifan" olmalıdır".

S.Novruzov özü necə, avtomobili idarə edə bilirmi? YAP-çı deputatın cavabı belə olub: "Əslində sürə bilirəm. Mən əsgərlikdə tank sürmüşəm, yəni "tankist" olmuşam. Tank sürməksə maşın sürməkdən daha çətindir. Amma indiki iş şəraitində maşın sürmək elə də asan deyil. Çünki yolboyu mobil telefonla danışırsan, vacib xəbərləri oxuyursan. Ona görə də maşın sürəndə bu, vaxt itkisinə səbəb olur. Odur ki, nəqliyyat vasitəsini özüm idarə etmirəm".