Biz bilirik ki, bugünkü gündə test imtahanının forması əmək bazarında tələb olunan bir sıra bilik və bacarıqları ölçmə qabiliyyətinə malik deyil.

Axar.az xəbər verir ki, bu sözləri ANS-in "Hesabat" analitik proqramına açıqlamasında Təhsil naziri Mikayıl Cabbarov deyib.

Onun fikrincə, keçirilən imtahanın qısa olması üstünlük, eyni zamanda bir sıra çatışmazlıqları özündə birləşdirir:

"Faktiki olaraq məzunun gələcəyi üç saatlıq bir imtahanda həll olunur və o imtahan ildə bir dəfə keçirilir. İmtahanın bir hissəsi test qaydasında keçirilə bilər, amma bura oxu və yazı vərdişləri də aid olmalıdır. Hazırda bu istiqamətdə TQDK ilə geniş müzakirələr aparırıq. Düşünürəm ki, hər iki qurum bu mövzunu bilir. İmtahanların forma və məzmunlarının dəyişməsi gözləniləndir".

Qeyd edək ki, nazir növbəti iki-üç il ərzində imtahanların gedişində hələ ki hər hansı dəyişikliyin gözlənilmədiyini bildirib.