Xəzər TV-nin Xəbərlər proqramının əsas buraxılışının aparıcısı Anar Nəcəflinin işdən ayrılmasının təfərrüatları məlum olub.

"Axar.az"ın əldə etdiyi məlumata görə, Anar Nəcəfli hələ bir ay əvvəl Xəzər TV-dən ayrılmaq qərarına gəlib. Təcrübəli aparıcının bu qərara gəlməsində əsas səbəb Xəbərlər departamentinin rəhbəri İbrahim Ünlübostanla aralarında olan münaqişədir. Anar Nəcəflinin departemntdə artan nüfuzu tabeçiliyindəki işçilərə diqtə etməklə ad çıxaran İbrahim Ünlübostanın xoşuna gəlməyib.

Televiziya daxilindən əldə etdiyimiz məlumatda bildirilir ki, o qədər də böyük nüfuzu olmayan departament rəhbəri hər dəfə işində yol verdiyi nöqsanları bəhanə edərək, aparıcının işinə müdaxilə edirmiş. Nəticədə vəziyyətin çıxılmaz olduğunu görən Anar Nəcəfli yeddi il işlədiyi televiziyadan getmək qərarına gəlib.

Əldə etdiyimiz məlumatda o da bildirlir ki, Anar Nəcəflidən əvvəl bir vaxtlar Xəzər TV-nin əsas simaları olan Lalə Eyvazova, Günel İsmayılqızı, Firuzə Qurbanlı, Emin Abbasov və İqrar Eyvazov müxtəlif zamanlarda İbrahim Ünlübostanla yaşanan münaqişə nəticəsində televiziyanı tərk ediblər.