Geqarkunik vilayətinə (Göyçə mahalı – red.) tez-tez səfər edirəm, orada bizim heç bir mövqe üstünlüyümüz qalmayıb.

Axar.az Globalinfo.az-a istinadən xəbər verir ki, bunu Ermənistan parlamentinin “Hayastan” fraksiyasının deputatı Arman Qazaryan deyib.

Deputat həmin ərazidə bütün strateji mövqelərə Azərbaycanın nəzarət etdiyini bildirib:

“Göyçədə atışma olduğunu eşitdim. Bu, yeni bir şey deyil. Orada belə hal tez-tez yaşanır. Ümumiyyətlə, 2022-ci ildə baş verən sentyabr döyüşlərindən sonra bizim orada heç bir mövqe üstünlüyümüz qalmayıb. Hamısını itirmişik. Əvvəl orada müdafiə xəttimiz 70 kilometr idi, artıq bu rəqəm 240 kilometrə qədər artıb. Ərazinin çox hissəsinə Azərbaycan nəzarət edir”.

Xatırladaq ki, Müdafiə Nazirliyi aprelin 1-i saat 22:00-dan 22:20-dək Ermənistan silahlı qüvvələrinin bölmələrinin Azərbaycan Silahlı Qüvvələrinin Naxçıvan istiqamətindəki mövqelərini atəşə tutması ilə bağlı məlumat yayıb.

Ermənistan Müdafiə Nazirliyi ilə gecə saatlarında şərti sərhəddə Göyçə və Dığ kəndi istiqamətlərində atışma olduğunu iddia edib.