Mingəçevir Bayraq Meydanında nasazlıq yaranıb.

Oxucuların Axar.az-a verdiyi məlumatda bildirilir ki, bayrağı saxlayan məftillər qırılıb, bayraq yerə düşüb, problemi isə İcra Hakimiyyəti aradan qaldırılmayıb.

Mingəçevir rayon icra başçısının müavini Məhluqə Cavadova Axar.az-a açıqlamasında faktı təsdiq edib və hadisənin güclü külək səbəbindən baş verdiyini deyib:

"Dünən bizim şəhərdə güclü külək əsib. Bu səbəbdən bayraq zədələnib. Onu aşağı salmaq istəyəndə elektrik mühərriki sıradan çıxıb. Mühərrikin təmiri də bir xeyli vaxt aparıb. Zavodda düzəlib gətirilənə qədər bayraq bükülmüş halda saxlanılıb. Mən özüm də orada olmuşam və təmirlə birbaşa maraqlanmışam, artıq nasazlıq aradan qaldırılıb".

Xatırladaq ki, Mingəçevir Bayraq Meydanının açılışı 2013-cü ilin aprelində Prezident İlham Əliyevin Mingəçevirə səfəri zamanı olmuşdu. Meydan şəhərin giriş hissəsində, Heydər Əliyev prospektində yerləşir. Bayraq dirəyinin hündürlüyü 42 metrdir.