Novruzun atributlarından biri də gənc qızların gələcək taleləri ilə bağlı müxtəlif inancları sınaqdan keçirməsidir. Bu bayramda subay qızlarımız fallar açmaqla bəxtlərini yozmağa çalışırlar.

Yazar xanımlar Axar.az-a vaxtilə açdıqları Novruz fallarından danışıblar.

Rəbiqə Nazimqızı:

"Heç vaxt ciddi yanaşmamışam fal söhbətlərinə, amma əyləncəlidir deyə, istifadə eləmişəm - xoş zarafat kimi. Yeniyetmə vaxtlarımda yatmazdan öncə kökə yediyim olub, amma yuxu görməmişəm. Bu günlərdə işdə yenə üzük falını təkrarladıq. Çox əyləncəlidir, zarafatlaşırıq belə proseslərdə. Adamın eyni açılır. Qulaq falına çıxdığım da olub, amma həmişə də qeyri-müəyyən söhbətlər eşitmişəm. Ya da beynim həmişə alternativlərlə işləyir deyə, eşitdiklərimə müxtəlif yozum vermişəm və sonda da demişəm ki, nə olacaqsa, olacaq. Amma bir neçə il əvvəl çərşənbə axşamı gördüyüm bir yuxu olub ki, hələ də onu yoza bilmirəm. Bilirəm ki, nəsə nəticəsi mütləq olacaq".

Çinarə Ömray:

"Universtetə hazırlaşırdım. Qızlarla qonşuya qulaq falına getdik. Hərə özünə lazım olan cümlələri eşitdi. Sıra məndə idi. Allah haqqı, az qala yarım saat qulaq asdım. Elə bil, zalım uşağı bütün ölüləri yarım saatlıq sükutla yad edirdilər. Səsləri də çıxmırdı. Axırda televizor bu sakitçilikdi bezib dilləndi ki, "Beko, bir dünya markası". Elə bil, evdən kimsə onun üzünə tərs-tərs baxdı, o da səsini kəsdi. Heç zad! Gəlib nənəmdən açmasını soruşdum. Nənəm dedi ki, bala, bunun açması bizim dövrə aid deyil, ona görə də cavab verə bilmərəm. Hələ də o cümlənin açılmaması beynimdə qalıb. Bilən varsa, yozsun..."

Sevinc Elsevər:

"13 yaşım olarkən əmim qızlarına qoşulub Novruz fallarından bir neçəsini sınaqdan keçirmişəm. Sonra böyüdüm, fallara həvəs qalmadı. Əmim qızları duzlu kökə bişirib yeyir, suya üzük sallayırdılar. Mən isə qapı pusmuşam. Nənəmin danışdığı bir əhvalat da məni çəkindirib fallardan. Nənəm gənc qız ikən təndirin içinə bir yumurta və qırmızı-qara mürəkkəb qoyub. Sınamaq istəyirmiş ki, bəxti qırmızı, ya qara olacaq. Səhər baxıb ki, yumurtaya qara xətt çəkilib. Nənəm özünü inandırmışdı ki, o yumurtaya görə bədbəxt olub. Bu, mənimçün çox kədərli əhvalat idi. Atası müharibədə itkin düşüb, nişanlı olduğu əmisi oğlunu qatardan vurub salmışdılar. İki körpəsini itirmişdi. Əri isə - yəni babam çox erkən yaşında vəfat etmişdi. Nənəm də bütün bədbəxtliklərinin səbəbini o yumurtada görürdü. Bu fal söhbəti məni heç açmayıb, inanmasam da..."