AMEA-nın müxbir üzvü Teymur Kərimliyə M.Füzuli adına Əlyazmalar İnstitutunun direktor vəzifəsinin icrası həvalə edilib.

Bu barədə "Axar.az"a Akademiyadakı mənbələrdən məlumat daxil olub.

Qeyd edək ki, T.Kərimli indiyədək Nizami adına Ədəbiyyat İnstitutunun direktor müavini işləyirdi. 2007-ci ildən AMEA-nın müxbir üzvüdür. 47 elmi iş, 3 monoqrafiyanın müəllifidir.

Hələlik, yeni təyinatla bağlı Əlyazmalar İnstitutunun kollektivinə heç bir informasiya verilməyib. İnstututun informasiya şöbəsindən "Axar.az"a bildiriblər ki, yeni direktorun təyinatı barədə onlarda rəsmi məlumat yoxdur.

Bu vaxta qədər Əlyazmalar İnstitutuna filologiya elmləri doktoru Məmməd Adilov rəhbərlik edib. Onun vəfatından sonra bu vəzifəni müvəqqəti olaraq filologiya elmləri doktoru Paşa Kərimov icra edirdi.

Xatırladaq ki, AMEA institutlarına direktorlar seçki yolu ilə müəyyənləşir. 2014-cü il yanvarın 28-də AMEA 36 qurumundan 23-nə direktor seçkisini elan edib və namizədlər irəli sürülür. Direktor seçkisi elan edilən elmi-tədqiqat müasisələri içərisində Əlyazmalar İnstitutu da var.