Bu gün İqtisadiyyat Nazirliyinin və Azərbaycan Respublikası Dövlət Neft Şirkətinin (SOCAR) təşkilatçılığı ilə Bakı Biznes Mərkəzində "Sənayenin inkişafına dövlət dəstəyi" mövzusunda tədbir keçirilib.

İqtisadiyyat Nazirliyindən Axar.az-a daxil olan məlumata görə, tədbirdə maşınqayırma, metallurgiya, tikinti, elektrik avadanlıqları və s. sahələrdə fəaliyyət göstərən 100-ə yaxın müəssisənin nümayəndəsi iştirak edib.

İqtisadiyyat nazirinin müavini Niyazi Səfərov qeyri-neft sektorunun inkişafında yeni mexanizmlərin tətbiqinin - sənaye zonaları, park və məhəllələrinin yaradılmasının əhəmiyyətini vurğulayıb.

Bildirilib ki, "Dövlət satınalmaları haqqında" qanuna edilmiş bir sıra dəyişikliklər nəticəsində tender təkliflərinin qiymətləndirilməsi zamanı yerli mallar (işlər və xidmətlər) üzrə tender təkliflərinin xeyrinə tətbiq edilən güzəştin həcmi 15%-dən 20%-ə artırılıb.

SOCAR-ın vitse-prezidenti David Məmmədov şirkətdə aparılan yenidənqurma və modernizasiya işləri barədə məlumat verib.

Tədbirdə həmçinin, bir çox şirkətin direktor və nümayəndələri də iştirak ediblər.