Aprelin 5-də Qafqaznews.az saytında "Bir azərbaycanlının Türkiyədə yaratdığı "Qurdlar Vadisi" – ARAŞDIRMA" başlıqlı yazı dərc olunub. Yazıda Musa Konak, Münir Boztəpə, Celal Zafer, Yusuf Konu və Ali Gergin adlı türkiyəli iş adamlarının Füzuli Aslanlı adlı şəxsdən şikayətləndiyi qeyd olunurdu.

"Mən Azərbaycanı və azərbaycanlı qardaşlarımı çox sevirəm. Hər zaman Azərbaycandan olan qardaşlarımla ortaq iş görməyə maraqlı olmuşam. Mənim qızım da, bu günlərə qədər Azərbaycan Tibb Universitetində təhsil alırdı. Lakin mənim 400 min dollar pulumu mənimsəyən şəxslər öz haqqımı tələb etdikdə məni qızımla təhdid etməyə başladılar. Bu təhdidlərdən narahat olaraq, qızımı dünən Türkiyəyə gətirdim, onun Bakıdakı təhsili də yarımçıq qaldı. Füzuli Aslanlı adlı fırıldaqçının yanında 18.03.1992 -ci il təvəllüdlü İmişli sakini Məmmədov Elton Yaqub oğlu, 10.10.1961- ci il təvəllüdlü Naxçıvan sakini Həsənov Hüseyn Həsən oğlu və Fizuli Aslanlının qohumu Azər adlı şəxs məni və mənim ailəmi öldürməklə, qızımı oğurlayıb başına oyun açmaqla məni təhdid edirlər", - yazıda bildirilib.

M.Konak söhbətində Füzuli adlı şəxsin müxtəlif illərdə saxta pasport düzəltdirdiyini, gah Füzuli Məmmədov, gah Füzuli Mehdiyev, gah da Füzuli Aslanlı soyadlarından istifadə edərək, sayı 25-30 arası türkiyəli iş adamlarına 30 milyon dollardan çox pul "atmasından" söz açıb. M.Konak bildirib ki, Füzulinin aldatdığı bir neçə iş adamını da tapıb, onlar da polisə müraciət ediblər, lakin onu məsuliyyətə cəlb etmək mümkün olmayıb:

"Polis baxıb ki, bunun sənədində soyadı Aslanlıdır, Mehdiyev deyil. Digər tərəfdən, müxtəlif şirkətləri oyuna salmaqla, özü kənarda qalıb. Bir çox adama da yerli vətəndaşla rəsmi nikaha girən həyat yoldaşı Aygün Kara adından çeklər verib, amma həmin çeklər boş çıxıb. Onun Türkiyədə 12 yaşlı Hüseyn Kara adlı oğlu da var. Özü dəfələrlə məhkəmə yolu ilə Azərbaycanda ad-soyadını dəyişdirir, sonra bura gəlib, kirə tutduğu bahalı avtomobillər, şıq geyimlərlə insanları aldadır.

Pasport məsələsində ona Naxçıvanda yüksək vəzifəli polis məmuru Sabo adlı birinin yardım etdiyini öyrənmişik. Mənim qızımı isə Elton adlı şəxs vasitəsi ilə təhdid edib".

Xatırladaq ki, əldə olunan məlumata görə, F.Aslanlının Hüseyn Abdullayev, İsgəndər Xəlilov kimi adamlara da pul atdığı, 11 milyon dollarlıq mübahisə nəticəsində Elbrus adlı ortağının 6 il əvvəl ona 11 bıçaq zərbəsi vurduğu və hazırda həbsdə yatdığı da sözügedən yazıda qeyd olunurdu.

Aprelin 5-də yazının dərcindən bir neçə saat sonra, özünü Fizuli Aslanlının bacısı kimi təqdim edən bir xanım F.Aslanlı ilə mobil nömrəyə zəng edərək, təhdid və şantajlar səsləndirib. Özünü təqdim etməyən həmin xanım söhbətdə prezidentin adından istifadə etməkdən belə çəkinmədi. "Azərbaycanda baş qarışıqdır. Şəhidlərimiz var. Amma inşallah, Allah qoysa sizə prezidentin yanından zəng vuracağam. Heç narahat olmayın" – xanım təhdid edib. Yazı saytda yayımlandıqdan sonra, həmin xanım yenidən zəng etmiş, adının Zeynəb olduğunu və 24 ildir İmişlidə yaşadığını demişdi. Zeynəb xanım F.Aslanlının bacısı olduğuna dəfələrlə and içərək, əməkdaşımızla görüşməyi təklif etmişdi: "Gəlin, görüşək, danışaq. İnanın mənə… Məndən sizə ziyan yox, xeyir gələr".

Bu günlərdə Qafqaz Xəbər Agentliyi araşdırmalarını davam etdirərək, məsələdə adı keçən Aygün Kara, Elton Məmmədov və Hüseyn Həsənov adlı şəxslərin mobil nömrələri ilə əlaqə yaratmağa çalışmışdı. Aygün Kara dəfələrlə saytın əməkdaşına "mən indi telefonda söhbət edirəm, 5-10 dəqiqə sonra danışarıq" deyərək, vaxtı uzadıb və nəhayət telefonunu söndürüb. A.Kara ilə əlaqə saxlamaq və onun mövqeyini dərc etmək imkanı olmayıb, lakin bu xanımın F.Aslanlı ilə əlaqələri ilə bağlı redaksiyaya məlumat verən iş adamları bildirib ki, bu yaxında Mersin şəhərində iş adamlarından 2 TIR mal alıb pulunu verməyən F.Aslanlı həmin pulla A.Karanın adına "SS 062 TT" nömrə nişanlı "Cip" alıb.

Şikayətçilər A.Karanın birinci ərindən olan oğlu Emin Karanın da F.Aslanlının dəstəsində olduğunu bildirdilər. Bundan başqa, Fizulinin yanında Turan Atəş adlı adam da var ki, Antalyadakı əlaqələri qurur, onun üçün "ov"lar tapır. Baki Ömrüuzun adlı iş adamı Qafqaznews.az-a bildirib ki, Füzuli 2011-2012-ci illərdə ona 300 min dollardan çox ziyan vurub və ona tora saldığı İbrahim adlı başqa bir iş adamının çeklərini verib.

"Mən İbrahimin yanına getdim, gördüm Füzuli onu da müflis edib, oyuna salıb. O, bir neçə şirkəti bir-birilə bağlayıb fırıldaqlar işlətməkdə mahir ustadır", –Baki Ömrüuzun qeyd edib.

Həmçinin, əldə olunan məlumata görə, F.Aslanlı telefon söhbəti zamanı Batumidə olub – həmin ərəfədə o Türkiyə polisi tərəfindən deport olunmuşdu. Səbəb isə, onun Fizuli Mehti adı ilə saxta TC pasportu düzəltməsi olub. Bu pasportun seriyası isə məlumat bazasında 1966-cı il təvəllüdlü, Mersin doğumlu Ömer Yılmazın adınadır.

Məlumata görə, həmin şəxs F.Aslanlının yaxın adamıdır və onun avtomobil-mənzil icarəsi işlərində də Ömer Yılmaz adından istifadə olunub. Onun Türkiyə polisinin əlinə düşməyi ilə bağlı isə maraqlı əhvalat danışıblar:

"Təxminən iki həftə əvvəl bir qrup iş adamı Füzulini yaxalayaraq, onu 5 saat ərzində meyvə-tərəvəz soyuducusuna salıb çıxarmış, pul tapıb verməsini tələb etmişdilər. O isə müxtəlif vədlər ilə onların əlindən xilas olmuş, pul axtarmaq əvəzinə dərhal polisə getmişdi. Polisdə isə onun saxta pasportla gəzdiyini biləndə ölkədən çıxarmağı qərara alıblar".

Musa Konak bu günlərdə əlaqə saxlayaraq, Füzuli Aslanlının hazırda Naxçıvanda olduğu barədə məlumat aldığını və çox güman ki, Naxçıvan DİN-də çalışan Sabo adlı dostu və digər tanışları vasitəsilə yenidən pasport dəyişdirərək Türkiyəyə qayıtmağa hazırlaşdığını deyib. O, həmçinin qeyd edib ki, bu yaxınlarda qızı ilə birlikdə Bakıya gələcək və Respublika Baş Prokuroru Zakir Qaralova bu şəxslərdən (Füzuli Aslanlı, Elton Məmmədov və Hüseyn Həsənov – red.) şikayət edəcək.

M.Konak onlarda bu şəxslər tərəfindən təhdid və şantaj olunduqlarına dair səs yazıları və digər sübut olduğunu da bildirib:

"Biz Zakir Qaralovun qəbuluna düşərək, bu insanların cəzalandırılmasını xahiş etmək istəyirik. Bizdə olan məlumata görə, Füzuli Azərbaycandadır. Onun növbəti dəfə pasport dəyişdirib ölkədən çıxması əngəllənməli və o məsuliyyətə cəlb olunmalıdır".

"Bizim apardığımız araşdırmalar zamanı, Sabo-Füzuli dostluğundan maraqlı bir etüdlə qarşılaşdıq. Belə ki, bir neçə il əvvəl Füzulinun qohumu Hüseyn Həsənov onun Türkiyədəki əməllərindən vahiməyə gələrək, Naxçıvana qayıtmışdı. Lakin mənbənin sözlərinə görə, Füzuli ilə çoxdan dostluğu olan Sabo onu tutaraq təcridxanaya salmışdı: "Yalnız Füzulidən üzr istədikdən sonra, onu azad ediblər və yenidən Türkiyəyə, öz dəstəbaşısının yanına qayıdıb". Beləliklə, maraqlı bir sual yaranır: Bir insan nə qədər böyük nüfuza və təsir dairəsinə malik olmalıdır ki, nə Türkiyədə, nə də Azərbaycanda ona "dur" deyəcək biri tapılmasın? Mövzu diqqətimizdədir", - sayt bildirib.