Bu gecə Bakının Badamdar qəsəbəsində yerləşən "Bulaq" restoranında baş vermiş atışma zamanı güllə ABŞ-ın Azərbaycandakı səfirinin müavini Derek Hoqanın maşınına dəyib.

Axar.az xəbər verir ki, bu barədə "Sputnik" agentliyinə Səbayel Rayon Polis İdarəsindən məlumat verilib.

ABŞ səfirliyindən də haqqın.az-a faktı təsdiqləyiblər.

"Cənab Hoqan avtomobildə olmayıb və hadisə zamanı səfirliyin heç bir əməkdaşı zərər çəkməyib", - səfirlikdən bildirilib.

Qeyd edək ki, bu gecə "Bulaq" restoranında atışma baş verib. Atışma zamanı iki nəfər – Fuad və Süleyman adlı şəxslər güllə yarası alıb. Hər iki şəxs xəstəxanaya yerləşdirilib.

Məlumata görə, hadisə iştirakçılarından biri artıq saxlanılıb. Hazırda hadisənin digər iştirakçılarının müəyyən edilərək tutulması istiqamətində əməliyyat-axtarış tədbirləri davam etdirilir.

Faktla bağlı Bakı şəhər Prokurorluğundan cinayət işi başlanıb, istintaq aparılır.