Xəzər dənizində yanan Rusiyaya məxsus gəmi Bakıya gətirilir.

Axar.az xəbər verir ki, bununla bağlı Fövqəladə Hallar Nazirliyi, Dövlət Dəniz Adminstrasiyası və "Azərbaycan Dövlət Dəniz Gəmiçiliyi" QSC birgə məlumat yayıb.

Azərbaycan Respublikasının Fövqəladə Hallar Nazirliyinin "Vixr-5" və "Azərbaycan Xəzər Dəniz Gəmiçiliyi" QSC-nin "LİUTOGA" gəmiləri Rusiya Federasiyası bayrağı altında üzən "PALFLOT-2" tankerini yedəyə alaraq Heydər Əliyev adına Bakı Dərin Özüllər Zavodu istiqamətində hərəkət edirlər.

Qeyd edək ki, bu gün 09:35-də Rusiya Federasiyası bayrağı altında üzən və Azərbaycanın Dübəndi limanından Türkmənistanın Alaca limanı istiqamətində yüksüz hərəkətdə olan "PALFLOT-2" tankerində sahildən təqribən 110 km məsafədə yanğın hadisəsinin baş verməsi barədə Dövlət Dəniz Administrasiyasının Milli Mərkəzinə SOS siqnalı daxil olub.

Təlimata uyğun olaraq, dərhal Azərbaycan Respublikasının Fövqəladə Hallar Nazirliyi və "Azərbaycan Xəzər Dəniz Gəmiçiliyi" QSC-nin müvafiq qüvvələri qəzanın nəticələrinin aradan qaldırılması əməliyyatına cəlb ediliblər. Fövqəladə Hallar Nazirliyinin "Mİ-17-1V" və "KA-32" helikopterləri və "Vixr-5" gəmisi, Xəzər Dəniz Gəmiçiliyinə məxsus "Caspian Voyager", "Caspian Protechtor", "İslay" və "Jura" gəmiləri yanğının söndürülməsi əməliyyatını həyata keçirib.

Görülmüş operativ tədbirlər nəticəsində yanğın saat 18:06-da tam söndürülüb.