Sumqayıtda kütləvi dava baş verib. Təqribən 20 nəfər
arasında baş vermiş davada iki şəxs ağır xəsarət alıb.
Sumqayıt Şəhər Polis İdarəsindən AzərTAc-a bildiriblər ki, gecə
saatlarında baş vermiş hadisə ilə bağlı həbs edilənlər var.
Bildirilir ki, Bakı-Quba avtomagistralının Sumqayıtdan keçən
hissəsində yol kənarında "Kral" adı altında fəaliyyət göstərən
kafedə mübahisə düşüb. Dava kafe sahibləri ilə müştərilər arasında
olub. Hadisəyə əsas səbəb müştərilərin xeyli vaxt kafedə oturmaları
və digər qonaqlara yer vərməmələri göstərilir. Mübahisə iki qrup
arasında əlbəyaxa davaya çevrilib. Nəticədə iki nəfər ağır
xəsarətlər alıblar. Yaralılar Astara rayon sakinləri 24 yaşlı Tural
Bayramov və 27 yaşlı İlkin Quliyevdir. Onlar dərhal Sumqayıt Şəhər
Xəstəxanasına çatdırılıblar.
Xəstəxananın reanimasiya şöbəsindən verilən məlumata görə, İlkin
Quliyevin vəziyyəti ağır olduğundan o, dərhal Bakı şəhərinə
göndərilib. Qolu və ayağı sınan, bir neçə bıçaq xəsarətləri
yetirilən Tural Bayramovun sözlərinə görə, kafe sahibləri onların
ciblərindəki pulun çoxluğunu gördükdən sonra dava salıblar.
Faktla bağlı Sumqayıt Şəhər Polis İdarəsində araşdırmalar
aparılır.