Bugünkü gənc nəsil üçün iki əsas təhlükə var: şagirdləri sosial mediada, xüsusilə Tiktokun mənfi təsirləri ilə, tələbələri isə mərc oyunlarının cəlbedici, amma məhvedici tələsi ilə üz-üzə qoymuşuq. Hər iki hal onların intellektual və mənəvi inkişafına böyük zərbə vurur.

Axar.az xəbər verir ki, bu sözləri təhsil eksperti Kamran Əsədov qeyd edib.

O bildirib ki, Tiktok şagirdləri asan əyləncə ilə aldadaraq, onların diqqətini uzun müddətli məqsədlərdən uzaqlaşdırır:

“Təhsil üçün vacib olan konsentrasiya və dərin düşüncə qabiliyyətlərini itirən gənclər günübirlik trendlərə qapılaraq vaxtlarını mənasız videolarla keçirirlər. Eyni zamanda, Tiktok vasitəsilə yayılan qeyri-sağlam məzmun onların əxlaqi dəyərlərini zəiflədir.

Tələbələr arasında mərc oyunları isə başqa bir faciədir. Gələcəyini qurmağa çalışan gənclər bu oyunların asılılığına düşərək, həm maddi, həm də mənəvi baxımdan ciddi itkilər yaşayır. Tələbə kreditləri və ya ailə büdcəsini riskə atan gənclər qumar tələsinə düşərək həyatlarını və gələcəklərini məhv edirlər.

Bu problemlərin qarşısını almaq üçün təkcə valideynlər deyil, cəmiyyət olaraq hamımız məsuliyyət daşıyırıq. Maarifləndirmə kampaniyaları ilə sosial medianın və mərc oyunlarının yaratdığı təhlükələri izah etməli, gənclərə sağlam həyat tərzi və məqsədyönlü həyat haqqında düşünməyi öyrətməliyik. Əks halda bu tələlər bizim gələcək nəslimizi bədbəxt edəcək”.