Bakıda mənzil bazrında aktivlik zəifdir. Sevindirici xəbər isə ondan ibarətdir ki, mənzillərin qiyməti yanvar ayında cüzi də olsa, ucuzlaşıb.

Axar.az xəbər verir ki, bu sözləri İqtisadiyyat.az-a açıqlamasında əmlak məsələləri üzrə ekspert Ramil Osmanlı deyib.

Onun sözlərinə görə, hazırda bazarda stabillik hökm sürür:

“Qiymətlərin artması ilə bağlı ortalığa çıxan məlumatlar daha çox spekulativ xarakterlidir. Hətta bəzi ərazilərdə bahalı mənzillərin qiymətində nisbi ucuzlaşma müşahidə olunub”.

Mütəxəssis vurğulayıb ki, mənzillərin ucuzlaşması bazarda əməliyyatların və müraciətlərin azalması, tələbin isə aşağı düşməsi ilə bağlıdır:

“Ucuzlaşma əsasən bahalı mənzillərdə baş verib, ancaq bu ucuzlaşma orta qiymətə olan mənzillərə də təsir göstərir”.

Ekspertin fikrincə, orta müddətdə qiymət artımı gözlənilmir:

“Ehtimallar həmişə var, amma ehtimallarla fakt ayrı məsələlərdir. Risklər həmişə var, amma bu, baş verən proseslərdən asılı olur. Bəzən iqtisadi amillər bazara o qədər də təsir etmir”.