12:45

Gürcüstanın Rustavi şəhərində 24 yaşlı azərbaycanlı kişi odlu silahla qətlə yetirilib.

Axar.az APA-ya istinadən xəbər verir ki, hadisənin mübahisə zəminində baş verdiyi bildirilir.

Məlumata görə, gənclər arasında mübahisə sonradan silahlı insidentə çevrilib. Qətlə yetirilənin Bolnisi sakini Vüqar Yaqubov olduğu bildirilir.

Onun xəstəxanaya çatdırılarkən aldığı xəsarətdən yolda vəfat etdiyi qeyd olunub.

Faktla əlaqədar istintaq başladılıb.

***

Gürcüstanın Bolnisi bələdiyyəsinin İncəoğlu kənd sakini, 24 yaşlı Vüqar Yaqubov ötən gün Rustavi şəhərində qətlə yetirilib.

Bu barədə Gürcüstan Daxili İşlər Nazirliyi məlumat yayıb.

Qeyd edilib ki, cinayəti törətməkdə şübhəli bilinən şəxs saxlanılıb.

“Hadisə ilə bağlı Gürcüstan Cinayət Məcəlləsinin (CM) 116 və 236-cı maddələri üzrə istintaq davam edir”, - nazirlikdən bildirilib.

Qeyd edək ki, CM-in 116-cı maddəsi ehtiyatsızlıqdan ölümə səbəb olma (altı aydan iki ilədək ev dustaqlığı və ya iki ildən dörd ilədək azadlıqdan məhrumetmə), 236-cı maddə isə qanunsuz silah əldə etmə, saxlama, gəzdirmə və daşıma hallarını (cərimə, altı aydan iki ilədək ev dustaqlığı və ya iki ilədək azadlıqdan məhrumetmə) nəzərdə tutur.

Hadisənin detalları məlum deyil.

İlkin məlumata görə, cinayət mübahisə zəminində baş verib.