Gəncə şəhərinin Nizami Gəncəvi prospekti və Fətullah Həsənov küçəsində avtomobil yolunun bəzi hissələrində asfalt örtüyü dağılıb, çökmələr baş verib.

Axar.az Teleqraf-a istinadla xəbər verir ki, problem ötən il Gəncəçayın daşması və selin yolu basmasından sonra yaranıb.

Lakin indiyədək yol bərpa olunmayıb, vaxt ötdükcə çökmələrin miqyası daha da böyüyüb.

Gəncə Şəhər İcra Hakimiyyətindən bildirildi ki, Fətulla Həsənov küçəsindən Nizami Gəncəvi prospektinə qədər olan 2,4 kilometrlik hissənin sol sahilindəki bəndlər şəhərə yağan aramsız yağışlar səbəbi ilə çayda sululuğun artması nəticəsində yuyulub:

"Bəndin uçma təhlükəsi yarandığına görə həmin ərazidəki asfalt örtüyündə çatlar əmələ gəlib. Yaranmış problemin aradan qaldırılması məqsədilə müvafiq tədbirlərin görülməsi üçün Gəncə Şəhər İcra Hakimiyyəti tərəfindən aidiyyəti dövlət qurumlarına rəsmi müraciət ünvanlanıb".