Azərbaycanla Rusiya arasında davam edən gərginliyin 2022-ci ildə imzalanmış Moskva Bəyannaməsinə də təsir edəcəyi iddia olunur. Bildirilir ki, Rusiya AZAL-a məxsus təyyarənin vurulmasından sonra sərgilədiyi davranışla Bəyannaməni kobud şəkildə pozur.

Moskva Bəyannaməsi ləğv edilə bilərmi? Məsələ beynəlxalq hüquqla necə tənzimlənir?

Axar.az xəbər verir ki, Siyasi və Hüquqi Araşdırmalar Mərkəzinin sədri, politoloq Xəyal Bəşirov Globalinfo.az-açıqlamasında rəsmi Bakının Çikaqo konvensiyasının tələblərinə uyğun olaraq Moskvadan cavab gözlədiyini bildirib:

“Tələblərin yerinə yetirilməməsi bir yana, rus mətbuatında bəzi şəxslərin anti-Azərbaycan mövqeyi, yalan məlumatların tirajlanması müşahidə edilir. Gərginliyin səngiyəcəyi və ya artacağı bilinmir. O ki qaldı Moskva Bəyannaməsinə, hazırkı davranışlar sazişə ziddir. Həmin bəyannamənin 7, 11, 17, 21-ci maddələri də bunu istisna edir. Sənəddə qeyd edilir ki, tərəflər öz fəaliyyətləri zamanı strateji tərəfdaşlığa və müttəfiqliyə zidd fəaliyyətdən çəkinməlidir”.

Ekspert bildirib ki, tərəflər beynəlxalq öhdəliklərə hörmət etməlidir:

“Fikrimcə, bəyannamənin pozulmaması üçün rəsmi Moskva öhdəliklərə əməl etməlidir. Əks təqdirdə, saziş kağız üzərində qalacaq”.

Qeyd edək ki, 2022-cil fevralın 22-də Moskvada Azərbaycan Prezidenti İlham Əliyev və Rusiya Prezidenti Vladimir Putin tərəfindən “Azərbaycan Respublikası ilə Rusiya Federasiyası arasında müttəfiqlik qarşılıqlı fəaliyyəti haqqında Bəyannamə” imzalanıb.