Qida Təhlükəsizliyi Agentliyinin (AQTA) Şirvan-Biləsuvar bölməsi tərəfindən Biləsuvar şəhəri Heydər Əliyev prospektində yerləşən çörək istehsalı sexində plandankənar yoxlama keçirilib.

Axar.az xəbər verir ki, yoxlama zamanı Elşad Hüseynova məxsus obyektin sanitar norma və qaydalara uyğun olmayan şəraitdə fəaliyyət göstərdiyi aşkar edilib.

Müəssisədə aparılan araşdırmalar zamanı sexin anbar və emal sahələrinin divar, döşəmə və tavan hissələrinin asan yuyula bilən materiallarla üzlənmədiyi, anbarda saxlanılan unun divar və döşəmədən ara məsafəsi gözlənilmədən yığılması, emal sahəsində çalışan işçilərin müvafiq geyim forması ilə təmin olunmaması, işçi masalarının paslanmaya davamlı materialdan hazırlanmaması, hazır bişmiş çörəklər üçün ayrıca sahənin ayrılmaması və məhsulların döşəmədən ara məsafəsi gözlənilmədən yığılması, eləcə də digər nöqsanlar sexdə ən adi qaydalara belə riayət olunmadığı müəyyən edilib.

Aşkarlanan nöqsanlarla bağlı qanunvericiliyin tələblərinə uyğun olaraq sahibkarlıq subyektinin fəaliyyəti məhdudlaşdırılıb və inzibati məsuliyyət tədbirləri görülüb.