Vətəndaşların Respublika meydanında olmaq və orada asudə vaxtlarını keçirmək hüquqları var.

Axar.az xəbər verir ki, bu barədə Ermənistanın daxili işlər naziri Arpine Sərkisyan İrəvanın mərkəzində səsləndirilən Azərbaycan mahnısı ilə bağlı sualları cavablandırarkən deyib.

"MTX artıq rəsmi açıqlama verib. Xahiş edirəm, bu hadisədən spekulyasiya məqsədilə istifadə etməyin və ona dövlətlərarası xarakter verməyin”, – deyə Sarkisyan vurğulayıb.

Xatırladaq ki, 30 yanvar tarixində sosial şəbəkələrdə bir qrup insanın İrəvanın mərkəzi meydanında Azərbaycan dilində "Qarabağ" mahnısını oxuduğu video yayımlanıb və bu, erməni cəmiyyətində geniş ictimai rezonans doğurub.

Ermənistanın Milli Təhlükəsizlik Xidməti (MTX) açıqlama verərək, hadisənin iştirakçılarının İrandan gələn və ölkədə 30 dekabr - 3 yanvar tarixlərində olan vətəndaşlar olduğunu bildirib. MTX-nin sorğusu əsasında İstintaq Komitəsi videonu sosial şəbəkədə yayımlayan şəxsi saxlayıb, lakin sonradan məhkəmə onu azad edib.

Məsələ ilə bağlı İranın Ermənistandakı səfiri Mehdi Sübhani də şərh verib. O bildirib ki, irqçi və ya millətçi şüarlar səsləndirən şəxslər İran xalqını təmsil etmir və ölkənin rəsmi mövqeyini əks etdirmir.