AZAL təyyarəsinin Aktau yaxınlığında faciəli şəkildə qəzaya uğramasından üç ay sonra hava gəmisinin kapitanı İqor Kşnyakinin ailəsi faciənin baş verdiyi əraziyə gedib.

Axar.az xəbər verir ki, bu barədə 1news.az məlumat yayıb.

Milli Qəhrəmanın həyat yoldaşı Yana Vilkova bunun ailənin qəza yerinə ilk səfəri olduğunu deyib.

O bildirib ki, hadisədən 3 ay sonra həmin yerə getmək, bu hüznlü gündə həlak olanların xatirəsini ehtiramla yad etmək vacib idi:

“Üç ay həm çox, həm də azdır. Sağaltmayan, ancaq ağrının şiddətini azaldan, o taleyüklü günün heç bir detalını yaddaşlardan silməyən zaman...”

Qeyd edək ki, 25 dekabr 2024-cü ildə Bakı-Qroznı reysini həyata keçirən AZAL təyyarəsi Qroznı səmasında HHM sisteminin hücumuna məruz qalıb və ciddi zədələnib. Rusiya ərazisində enişinə izn verilmədiyindən Qazaxıstana istiqamət alan təyyarə zədə səbəbindən Aktau yaxınlığında qəzaya uğrayıb. Təyyarənin göyərtəsində 62 sərnişin və 5 heyət üzvü olub. 3 heyət üzvü də daxil olmaqla 38 nəfər həlak olub, 29 nəfər sağ qalıb.