BMT-nin Nyu Yorkdakı baş qərargahında 4 aprel – Beynəlxalq Mina Xəbərdarlığı və Minatəmizləmə Fəaliyyətinə Yardım Günü çərçivəsində Azərbaycanın mina problemi ilə bağlı brifinq keçirilib.

Axar.az Report-a istinadən xəbər verir ki, Azərbaycanın BMT yanında Daimi Nümayəndəliyi və Beynəlxalq Münasibətlərin Təhlili Mərkəzinin (BMTM) birgə təşkilatçılığı ilə keçirilən tədbir Azərbaycanda humanitar minatəmizləmə fəaliyyəti ilə insanların həyatının xilas edilməsi mövzusuna həsr olunub.

Brifinqdə Xarici İşlər Nazirliyinin Hərbi-siyasi məsələlər idarəsinin rəis müavini Anar Mütəllimov, BMTM-nin İdarə Heyətinin sədri Fərid Şəfiyev, Azərbaycanın BMT yanında Daimi bümayəndəsi Tofiq Musayev, BMT-nin müxtəlif ixtisaslaşmış qurumlarının rəsmiləri, Birləşmiş Millətlər Təşkilatının Minalardan Təmizləmə Xidmətinin (UNMAS) direktor müavini Rita Gunaryati Lubis, BMTİP-in Böhran Bürosunun rəhbəri Devanand Ramiah, Marşal İrsi İnstitutunun icraçı direktoru Elis Bekker, üzv ölkələrin nümayəndələri və BMT-də fəaliyyət göstərən jurnalistlər iştirak ediblər.

T.Musayev çıxışında Azərbaycanın 13 %-dən çox ərazisinin mina və partlayıcı sursatların təhlükəsi altında olduğunu vurğulayıb. O, 2020-ci ilin noyabrından etibarən ölkədə 388 mina partlayışı baş verdiyini, nəticədə 70 nəfərin həlak olduğunu, 318 nəfərin isə ağır yaralandığını bildirib. Diplomat Azərbaycanın humanitar minatəmizləməni milli səviyyədə 18-ci Dayanıqlı İnkişaf Məqsədi (SDG) kimi elan etdiyini xatırladıb və bu sahədə BMT ilə birgə üç beynəlxalq konfransın təşkil edildiyini qeyd edib.

Səfir həmçinin, Azərbaycanın İnsan Haqları Şurasında təqdim etdiyi və dünən qəbul edilən “Piyadalar əleyhinə minaların insan hüquqlarına təsiri” adlı qətnamə barədə qonaqlara məlumat verib.

Tədbirdə mina ilə çirklənmiş ərazilərdə aparılan minatəmizləmə və bərpa işlərini əks etdirən qısa film təqdim olunub.

F.Şəfiyev brifinqdə dünyada ən çox minalarla çirklənmiş ölkələr sırasında olan Azərbaycanın mina problemi barəsində geniş təqdimatla çıxış edib.

O, çıxışında BMT rəsmilərinə, üzv ölkələrin nümayəndələrinə və ictimaiyyətə Azərbaycanın humanitar minatəmizləmə fəaliyyətinin vacib aspektləri barədə ətraflı məlumat verib.

A.Mütəllimov Azərbaycanın mina təhlükəsi ilə bağlı beynəlxalq əməkdaşlıq çərçivəsində həyata keçirdiyi təşəbbüslərdən danışıb və mina probleminin məcburi köçkünlərin təhlükəsiz qayıdışına mane olduğunu vurğulayıb.

UNDP-nin nümayəndəsi Devanand Ramiah, ANAMA ilə uzunmüddətli əməkdaşlığa toxunaraq, beynəlxalq maliyyə dəstəyinin artdığını və qadınların mina təmizləmə fəaliyyətinə cəlb edilməsinin vacibliyini qeyd edib. Marşal İrsi İnstitutunun icraçı direktoru Elis Bekker təşkilatın Azərbaycana 93 mina axtaran it bağışladığını və bunun kifayət qədər böyük ərazinin təmizlənməsinə töhfə verdiyini bildirib.

BMT rəsmiləri Azərbaycanın beynəlxalq mina təmizləmə mərkəzi yaratmaq təşəbbüsünü yüksək qiymətləndirərək, Avropa İttifaqının bu məqsədlə 10 milyon avro ayırdığını bildiriblər. R.G.Lubis Azərbaycanın mina təmizləmə sahəsində liderliyini vurğulayıb.

Tədbirdə mina təhlükəsi, humanitar fəaliyyət və beynəlxalq əməkdaşlıq mövzularında müzakirələr aparılıb, Azərbaycan bu sahədə qlobal səylərə verdiyi töhfələrə görə yüksək qiymətləndirilib.