Təhsil sahəsində olan problemlər onu göstərir ki, bu sahəyə aid olmayan insanların funksional vəzifələrə gətirilməsi ciddi fəsadlara yol açır.

Bu sözləri Axar.az-a açıqlamasında təhsil eksperti Elşən Qafarov məktəblərdə dərs yükünün ağır olması ilə bağlı şərh verərkən deyib.

“Məktəblərdə şagirdlərin yaş dövrünə uyğun olaraq verilən dərs yükü ağırdır. Xüsusilə ibtidai siniflərdə xarici dil və informatika fənlərinin salınmasının hansı məqsəd daşıdığını biz mütəxəssislər də müəyyən edə bilmirik.

Tədris planı daha çox ağır və yorucu yox, motivasiyaedici olmalıdır. Həmçinin dərs miqdarının çox olması bilik və bacarıqların daha çox əldə ediləcəyi mənasına gəlmir. Dərs yükünün çox olması şagird, müəllim və valideynlər arasında dərslərin birinci, ikinci və üçüncü dərəcəli kateqoriyalara bölünməsinə gətirib çıxarır ki, bu da düzgün yanaşma deyil. Ümumiyyətlə, ümumitəhsil məktəblərində tədris planı ilə bağlı ciddi islahatlara ehtiyac var.

Ən böyük problem isə odur ki, 29 sentyabr 2020-ci il tarixində Nazirlər Kabinetinin “Ümumi təhsil pilləsinin dövlət standartı və proqramları (kurikulumları)”nın təsdiq edilməsi haqqında qərarı çıxmışdı, amma dövlət standartlarına uyğun olaraq təhsil proqramlarının hamısı tam təsdiq olunmayıb. Yəni bu dərsliklərin və fənlərin nəyin əsasında həyata keçirildiyi sual yaradır”, - o bildirib.

Ekspertin sözlərinə görə, Elm və Təhsil Nazirliyinin fəaliyyəti yalnız imtahan, təlim və layihələrin həyata keçirilməsi ilə bağlıdır:

“Təhsilin məzmunu və təhsil müəssisələrinin tərbiyə prosesi kənarda qalıb.

Qeyd edim ki, bu gün yalançı təlimçilər ordusu yaranıb. Həmin təlimçilərin öndə olması isə çox ciddi fəsadlara gətirib çıxarır. Ona görə də təhsil sahəsində ciddi addımlar atılmalıdır”.